Ўзбекистонда адвокатлар сони нега камлигига мутассаддилар изоҳ берди

Ахборот ва оммавий коммуникациялар агентлигида 12 ноябрь куни Адвокатлар палатаси ва Адлия вазирлиги вакиллари билан матбуот анжумани бўлиб ўтди.

ЎзАнинг хабар беришича, анжуманда 2018 йил 12 майда қабул қилинган «Адвокатура институти самарадорлигини тубдан ошириш ва адвокатларнинг мустақиллигини кенгайтириш чора-тадбирлари тўғрисида»ги Президент фармони ижроси юзасидан ўтган давр мобайнида амалга оширилган ишлар таҳлил қилинди.

Қайд этилишича, тергов ҳибсхоналари ва ёпиқ турдаги муассасаларда адвокатлар ва ҳимоя остидаги шахслар учрашуви учун аудио ва видеокузатув қурилмалари бўлмаган 69 та хона қайта жиҳозланиб, уларда визуал кўриб туриш имконияти яратилди.

Шунингдек, адвокатлик лицензиясини бериш ва адвокатлик тузилмаларини давлат рўйхатидан ўтказиш тартиби сезиларли даражада соддалаштирилди. Адвокатлик лицензиясининг амал қилишини тўхтатиб туриш ва тугатиш суд томонидан амалга оширилиши белгиланди.

Натижада адвокатларнинг лицензиясини тугатиш жорий йилнинг биринчи ярмида ўтган йилнинг шу даврига нисбатан 2,3 бараварга (13 нафар) камайди. Адвокатларнинг суд биносида компьютер, мобил ва бошқа алоқа воситаларидан ҳеч бир монеликсиз фойдаланиши йўлга қўйилди.

Тадбирда Ўзбекистонда нима сабабдан адвокатлар сони камлиги, соҳа бўйича мутахассисларнинг етишмаслиги борасидаги саволга Адвокатлар палатаси раиси биринчи ўринбосари Шуҳрат Содиқов жавоб берди.

«Қонунчилигимиз бўйича адвокат бўлиш учун талабгор 2 йиллик юридик тажрибага эга бўлиши керак. Биз соҳага ёшларни жалб қила олмаяпмиз. Ҳозирда 4 минг адвокат орасида 70 нафаргина 30 ёшгача бўлгани бор. Талабалар билан яқиндан ишлаяпмиз, лекин уларни касбимизга олиб киришда 2 йиллик тажриба деган жойи бор ва биз 2 йилни йўқотяпмиз. Талабгор ё чет элга ўқиш ёки ишга кетиб қолади, ё бошқа иш топиб кетади. Адвокатлар палатаси ҳузурида талабалар учун клуб очганмиз. Куни кеча ундаги Тошкент давлат юридик университетининг 15 нафари адвокат бўламан деяпти, лекин улар эртага 2 йил сенга иш бера олмайман деганимиздан кейин уни бошқа иш берувчи олиб кетади. Шу тариқа ёш кадрларни ҳам йўқотяпмиз. Янги қонунда бу тўсиқни олиб ташлаймиз ва келажакда умид қиламизки адвокатлар сони ортади», — деган у.

Маълумот учун, Ўзбекистонда 1 та адвокат 8 250 нафар фуқарога тўғри келади. Бу кўрсаткич АҚШда 256 нафар, Италияда 260 нафар, Германияда 500 нафар, Озарбайжонда 667 нафар, Голландияда 900 нафар, Францияда 1 403 нафар, Қозоғистонда 4 000 нафар фуқарога тўғри келади.