Central Asia’s Got Talent кўрсатувида ўзбекистонлик ногиронлиги бўлган қизалоқ Ирода Ўрозова иштирок этиб, ўзи ёзган «Шукр қилинг» деб номланган шеърини ўқиб ҳакамларни таъсирлантиргани ҳақида хабар берилган эди.
Ўзбекистон Хотин-қизлар қўмитаси матбуот хизматининг хабар беришича, Ирода Ўрозовага Зулфия номидаги давлат мукофоти берилиши мумкин.
Хотин-қизлар қўмитаси раиси Элмира Боситхонова Ирода ўқийдиган Тошкент шаҳридаги 100-ихтисослаштирилган мактаб-интернатга ташриф буюриб, Ирода билан учрашган.
«Ирода Ўрозова асли Сурхондарёнинг Қизириқ туманидан. Отаси Фарҳод ака ва онаси Ойсултон опалар фарзандининг иқтидорини парвариш қилишади. Устозлари ҳам мунтазам эътибор қаратишади. Унинг қўлчаларида туғма ногиронлик бор. Шеър ёзади, рақсга тушади ва ашула ҳам айтади. Мактабда 2 марта шашка бўйича мусобақа ғолиби ҳам бўлган», — дейилади хабарда.
Сенатор, Бош вазир ўринбосари, Ўзбекистон Хотин-қизлар қўмитаси раиси Элмира Боситхонова октябрь ойида масъул бўлимларга Ирода Ўрозова ўқиётган Олмазор туманидаги мактаб-интернатни маънавий оталиққа олишни маълум қилган ҳамда молиявий жиҳатдан ҳам кўмаклашиш чораларини кўриш топшириғини берган.
Қўмита ва мактаб ўртасида бу жараён амалга оширилмоқда, дейилади хабарда.
Элмира Боситхонова Ирода Ўрозованинг истеъдодини рағбатлантириш, шунингдек, уни ҳамда ушбу мактаб-интернатда ўқиётган у каби иқтидорли қизларни Зулфия номидаги давлат мукофотига номзодликка тайёрлаб бориш тизимини йўлга қўйиш топшириғини берди.
Изоҳ (0)