Жиноят ишлари бўйича Сирдарё вилояти Мирзаобод тумани суди томонидан жамиятда юриш-туриш қоидаларини қасддан менсимаган, ўзаро жанжаллашиб, бир-бирига турли даражадаги тан жароҳатни етказган икки нафар ҳайдовчининг ҳаракатлари юзасидан жиноят иши кўриб чиқилди. Бу ҳақда «Постда» нашри хабар берди.
Иш ҳужжатларига кўра, судланувчи Акмал Ботиров (исм-шарифлари ўзгартирилган) Lacetti русумли автомашинасини йўловчиларсиз Гулистон—Деҳқонобод йўналиши бўйлаб бошқариб келаётган бўлган. Ушбу автомобиль йўлининг қарама-қарши йўналишидан эса Ҳасан Бойиров ичида йўловчилар бўлган Captiva русумли автомашинасини узоқни ёритувчи чироқларни ёққан ҳолда бошқариб келган. Натижада Акмал Ботиров бошқарувидаги автомашина йўлнинг қарама-қарши томонига чиқиб, Captiva’нинг ҳаракатланишига тўсқинлик қилган.
Бу воқеадан сўнг ҳайдовчилар йўл четида тўхтаб ўзаро жанжаллашиб, бир-бирини уриб, турли тан жароҳатини етказишади. Шу вақтда Matiz русумли автомашинасида ҳаракатланиб келган профилактика инспектори ва бошқалар уларни зўрға ажратади.
Воқеага ойдинлик киритиш мақсадида улар Мирзаобод тумани ИИБ биносига келтирилади. Икки ҳайдовчи шунда ҳам тегишли хулоса чиқармайди. Уларнинг жанжали бу жойда яна давом этади.
«Қисқаси, ҳайдовчиларнинг жанжали қимматга тушди. Акмал Ботировнинг укаси автомашинани таъмирлаб беришни сўраб борганида Captiva ҳайдовчиси Ҳасан Бойиров харажатдан қочиб, уни уриб, оғир тан жароҳати етказади. Суд экспертиза хулосалари ва бошқа тақдим этилган ҳужжатларга таяниб, жавобгарнинг қилмишига яраша ажрим чиқарди: У жабрланувчининг даволаниши учун кетган харажатларни тўлаш баробарида, Lacetti автомашинасини ҳам таъмирлаб беришга мажбур бўлди», — дейилади хабарда.
Аввалроқ Тошкент шаҳар Олмазор туманида ҳайдовчилар ўртасида келишмовчилик юз бергани ҳақида хабар берилган эди. Унда ҳайдовчилардан бири тўппонча билан ўқталган. Кейинчалик аниқланишича, ушбу тўппонча пластмассадан тайёрланган ўйинчоқ бўлган.
Изоҳ (0)