Ангренда Гулноза исмли 25 ёшли аёл 1999 йилда туғилган Зуҳриддин исмли танишини ўлдириб қўйди. Бу ҳақда MY5 телеканалининг «Марказий студия» ахборот дастурида хабар берилди.
«Айбланувчи Гулноза Исроилова ўз хонадонида баъзида тирикчилик мақсадида сартарошлик қилиб турган. 25 октябрь куни тунда 1994 йилда туғилган аёл 20 ёшли йигити билан Ангрен шаҳар 5/5 даҳасида жойлашган уйига борган. Бироз тортишувли суҳбатдан сўнг, ўрталарида ўзаро жанжал келиб чиқади ва Гулноза ошхона пичоғи билан Зуҳриддиннинг юрагига бир маротаба санчиб, уни қасддан ўлдирган. Соат тунги 02:30 лар эди. Бу ҳам етмаганидек, Гулноза Ангрен шаҳар ИИБга қўнғироқ қилиб, Зуҳриддинни ўз жонига қасд қилди дея, ёлғон хабар берган», — дейилади хабарда.
Хабардан сўнг, тезкор тергов гуруҳи воқеа жойига етиб борган ва мазкур хонадоннинг кириш йўлаги қисмида фуқаро Зуҳриддин Абдуғаниевнинг мурдаси аниқланган.
Содир этилган ҳолат бўйича Жиноят кодексининг 97-моддаси («Қасддан одам ўлдириш») 1-қисми билан жиноят иши қўзғатилган.
Изоҳ (0)