Саноат, қурилиш ва савдо масалалари қўмитаси томонидан Ўзбекистонда кўп квартирали уйларнинг ҳолатини яхшилаш мақсадида Реновация дастурини ишлаб чиқиш бўйича амалга оширилаётган ишлар юзасидан Уй-жой коммунал хизмат кўрсатиш ва Қурилиш вазирликларининг ахбороти эшитилди, деб хабар беради ЎзА.
Таъкидланишича, айни пайтда Уй-жой коммунал хизмат кўрсатиш вазирлиги томонидан республикадаги мавжуд 34 584 та кўп қаватли уй-жой фонди барча йўналишлар бўйича хатловдан ўтказилган.
Хатлов натижасига кўра, республикадаги жами кўп қаватли уйларнинг аксарияти 1990 йилларгача қурилган. Уйларнинг 13 507 таси таъмирга муҳтож эмаслиги аниқланди. Шунингдек, уйларнинг 20 622 таси таъмирга муҳтож, 455 тасида авария аломатлари мавжудлиги маълум бўлган. 2019 йилнинг 1 октябрь ҳолатида мазкур авария ҳолатидаги уйларнинг 285 таси бўйича ҳудудлардаги лойиҳа ташкилотлари томонидан тегишли хулосалар берилиб, уларнинг 57 тасини бузиш, 228 тасини таъмирлаш лозимлиги қайд этилди.
Президент Шавкат Мирзиёев ўтган йилнинг декабрь ойида парламентга йўллаган мурожаатномасида дунёнинг йирик мегаполислари тажрибасини ҳисобга олган ҳолда реновация дастурини амалга ошириш зарурлигини маълум қилганди.
Реновация дастурининг асосий мақсади бу фавқулодда ҳолатларнинг олдини олиш ва кўп квартирали уйларда истиқомат қилаётган фуқароларнинг ҳаёти хавфсизлигини таъминлаш мақсадида эскириб қолган кўп қаватли уйлар ўрнида босқичма-босқич янги уй-жойлар қуришни назарда тутади.
Унда ривожланган давлатлар тажрибаси асосида уйларнинг ертўла ва том қисмини теплоизоляция қилиш, ойналарни замонавий ромларга алмаштириш, 5 қаватли уйларга заруратдан келиб чиқиб ташқи лифтлар ўрнатиш, уйларнинг фасад қисмини шаҳарсозлик талаблари асосида таъмирлаш, иссиқлик таъминоти тармоқларини изоляция қилиш, энергия тежамкор механизмларни жорий этиш орқали самарадорликни ошириш каби масалалар режалаштирилади.
Изоҳ (0)