Аввалроқ, Соғлиқни сақлаш вазирлиги «Навоийазот»га тегишли ПВХ заводида 4 киши номаълум газдан заҳарланиб касалхонага ётқизилгани ҳақида хабар берганди. «Ўзкимёсаноат» АЖ матбуот хизмати ушбу хабарга ўз муносабатини билдириб, хабар ассосиз эканлигини маълум қилди.
«28 октябрь куни ПВХ заводи ва умуман ‘Навоийазот’ АЖ ҳудудида ҳеч қандай фавқулодда ҳолат юз бермаган. Шу куни соат 17:00 лар атрофида ‘Навоийазот’ АЖ Тиббий санитария қисмига ‘Навоийазот’ АЖ ҳудудидаги ‘ПВХ, каустик сода ва метанол ишлаб чиқариш мажмуаси’ қурилишида иштирок этаётган 4 нафар ходим ўзларини ёмон ҳис этганликлари туфайли шахсан мурожаат этган», — дейилади хабарда.
«Навоийазот» АЖ Тиббий санитария қисми тиббиёт ходимлари томонидан тиббий кўрик вақтида уларнинг организмида ҳеч қандай кимёвий моддалардан заҳарланиш аломатлари аниқланмаганлиги туфайли овқатдан заҳарланиш тахмини билан Навоий шаҳар юқумли касалликлар шифохонасига «Навоийазот» АЖ хизмат автомобилида олиб борилган. У ердаги кўрикдан сўнг бир нафар ходимга шу куннинг ўзида жавоб берилган, қолган 3 нафар мурожаат этган ходимлар Республика шошилинч тез тиббий ёрдам илмий марказининг Навоий вилоят филиали токсикология бўлимида олиб қолинган ва 29 октябрь куни соат 10:00 да аҳволи яхшилиги туфайли шифохонадан чиқарилган.
Таъкидланишича, айни вақтда ушбу ходимлар ўз хизмат вазифасини бажармоқда.
«Хабарда келтирилган ҳамда текширилмаган баъзи маълумотларга ойдинлик киритишни лозим деб ҳисоблаймиз. Шунингдек, тиббиётда ‘Номаълум куйдирувчи газдан’ заҳарланиш ташхиси ҳақида маълумот мавжуд эмаслигини маълум қиламиз», — дейилади «Ўзкимёсаноат» АЖ матбуот хизматининг муносабатида.
Изоҳ (0)