Қамаши туманида фермерларга моғорлаган ғалла уруғи тарқатилмоқда

Қамаши туманидаги фермерларга моғорлаган ғалла уруғи тарқатилмоқда. Ҳолатдан норози бўлган фермерлар уруғ тарқатувчи мутасаддиларга бу ҳақда айтсада, масъуллар бунга эътибор бермаётганидан нолимоқда. Норози фермерлар «Дарё»га ҳолат ҳақида маълум қилди.

«Хушвақт бобо» фермер хўжалиги раҳбари Машраб Хушвақтовнинг айтишича, у 6 тонна 250 килограмм ғалла уруғлик олган, уруғликнинг ҳаммаси моғорлаб кетган. Уларни экиб бўлмайди. Фермер бу ҳолатни уруғ берувчиларга тушунтирган. Улар келиб кўрган ва «Ҳеч нарса қилмайди, экаверинг», — деган. Фермер эса уруғни экмасдан ушлаб турибди.

Фермер Машраб Хушвақтовнинг сўзларига кўра, бу ҳақда Вазирлар Маҳкамаси ҳузуридаги агросаноат мажмуи устидан назорат қилиш инспекцияси ходимлари ҳам хабар топган.

«Инспекция ходимлари келиб кўриб кетди, — дейди фермер. — Агар қайтариб олиб келсангиз, алмаштириб берамиз дейишяпти. Мен уруғни олиб келиш учун харажат қилганман. Қайтариб олиб бориш ва алмаштирилган уруғни олиб келиш учун яна харажат қиламанми? Нега масъулларнинг масъулиятсизлиги сабаб мен овора бўлишим керак?»

Уруғни алмаштирган фермер хўжаликларининг таъкидлашича, алмаштирилган уруғлар ичида ҳам моғорлагани бор.

Фермерлардан бирининг маълум қилишича, у 12 тонна 150 килограмм уруғ олган, улар моғорлагани боис алмаштирган. Алмаштирилган уруғ ичидан ҳам моғорлаганлари чиққан. Фермер эса уруғни экмоқда.

Вазирлар Маҳкамаси ҳузуридаги агросаноат мажмуи устидан назорат қилиш инспекцияси вакили Искандар Тилововнинг айтишича, уруғларнинг моғорлаб кетгани бор гап. Тарқатилган ғалла уруғини қабул қилиб олган фермерлардан икки нафари инспекцияга шикоят қилган. Инспекция томонидан текширув ўтказилганда, ҳақиқатан ҳам уруғлар моғорлагани маълум бўлган. Ҳолат юзасидан далолатнома тузилиб, масъулларга хабар берилган.

Искандар Тилововнинг қайд этишича, Қамаши туманидаги 300 дан ортиқ фермер хўжаликларига берилиши лозим бўлган ғалла уруғи Яккабоғ туманида дориланган бўлиб, Қамашига келтирилганига 15—20 кун бўлган.

«Бу борада муаммога учраётган фермер хўжаликларига мурожаат қилиб, уруғ алмаштириб берилишини таъминлаймиз», — дейди инспекция масъули.