Андижон шаҳри Бўстон даҳаси Садоқат кўчасида жойлашган кўп қаватли Камолот уйи орқа томонидаги майдон аҳоли томонидан ноқонуний чиқиндихонага айлантирилганлиги аниқланди.
Вилоят ҳокимлиги матбуот хизматининг хабар беришича, Андижон шаҳар Экология инспекцияси, Экотранс МЧЖ , Ободонлаштириш бошқармаси ҳамкорлигида ҳудуд тунги навбатчи гуруҳлар ёрдамида тозаланди.
Маҳалла фаоллари ва аҳоли билан суҳбатлашилганда ушбу майдонда аҳлат ва чиқинди учун контейнер мавжудлиги, у кунда бўшатиб турилиши аниқланди.
«Қанчалик ачинарли ҳолат бўлмасин, тозалаш жараёни давомида матбуот хизмати ходимлари ҳудуд аҳолисини уйидан чиққан чиқиндиларни мазкур жойга ташлаб кетишда давом этишларини гувоҳи бўлган. Ноқонуний ҳолатга, шу жойнинг ўзида чора кўрилиб, аҳлат тўккан фуқарога нисбатан жарима жазоси қўлланилган.
Майдон тозаланди, жойида муаммога ечим ҳам топилди. Тозалаш жараёнида ушбу ҳудудда яшовчи тадбиркор махсус маиший чиқиндихона қуриб бериш таклифи билан чиқди. Ҳозирда керакли ҳужжатларни расмийлаштириш жараёни олиб борилмоқда», — дейилади хабарда.
Изоҳ (0)