Андижон вилояти ҳокимлиги «Менинг юртим» телеканали томонидан Андижон шаҳри «Мирпўстин» МФЙга қарашли Лойиҳавий кўчасидаги аҳолини йўл, ичимлик суви, электр энергияси ва табиий газ муаммоси қийнаётганлиги танқид қилинган лавҳага муносабат билдирди.
Таъкидланишича, эфирга узатилган лавҳадаги ҳолат зудлик билан Андижон шаҳар ҳокимлиги матбуот хизмати томонидан ўрганилиб чиқилган.
Андижон туманига қарашли электр тармоқлари ташкилоти орқали электр энергияси билан таъминланувчи Лойиҳавий кўчасидаги ёғоч таянчлар ҳақиқатан ҳам яроқсиз, авариявий ҳолатидалиги ва кўча учун 9 дона бетон таянч кераклиги аниқланган. Бу борада Андижон шаҳар ҳокимлиги томонидан далолатнома тузилиб, Андижон туман ЭТ корхонасига юборилган.
Газ масаласи бўйича, Андижон шаҳаргаз идораси маълумотига кўра, ушбу МФЙ кўчалари 2011 йилдан «Табиий газ етиб келиши қийин ҳудуд» деб топилиб, шу йилдан газ қувуридан газ бериш тўхтатилган ва суюлтирилган газ таъминотига ўтказилган. Шу кунга қадар маҳалла аҳолиси режа график асосида суюлтирилган газ билан мунтазам равишда таъминланиб келинаётгани аниқланди.
Ичимлик суви масаласи бўйича, шаҳар «Сувоқова» ташкилоти ишчи гуруҳи томонидан маҳалла ичимлик суви тизими текшириб чиқилиб, носозлик аниқланиб, жойида таъмирланган, юзага келган муаммо бартараф этилган.
Йўл масаласи бўйича шаҳар ҳокимлиги маъмурияти «Мирпўстин» МФЙ Лойиҳавий кўчасини асфалтлаштиришни лозим деб топди ва босқичма-босқич олиб борилаётган «Ички маҳаллалар йўл тизимини таъмирлаш дастури»га киритилди.
Изоҳ (0)