Тожикистон президенти Эмомали Раҳмон мамлакат мустақил касаба уюшмалари федерациясининг фаоллари билан ўтказган йиғилишда 2019 йилнинг май ойи ҳолатига ҳар қандай мулкчилик шаклидаги корхоналардаги ёлланма ишчилар сони 1,18 миллионга етгани ва бу меҳнатга лаёқатли аҳолининг 51,1 фоизини ташкил қилишини қайд этган. Шунингдек, Эмомали Раҳмон 870 минг нафар ишчининг касаба уюшмаларига аъзо эканлигига урғу берди.

Тожикистон президенти 2015—2017 йилларда республикада норасмий бандлик ҳолатларини қисқартириш бўйича комплекс дастур ишлаб чиқилгандан сўнг 2016 йилдаги тадқиқотларда норасмий бандлик кўрсаткичи 29,4 фоизга (249,5 минг одам) тушгани ва 2009 йилдагига нисбатан 24,4 фоизга қисқарганлигини таъкидлади. Раҳмоннинг айтишича, норасмий бандликни келажакда ҳам қисқартириб бориш мақсадида 2019—2023 йиллар учун янги дастур ишлаб чиқилади.

Аҳоли бандлигини таъминлаш ва меҳнат агентлиги маълумотларига кўра, 2019 йилнинг 1 июнь ҳолатига Тожикистонда 91 мингта турли мулкчилик шаклига эга корхона рўйхатдан ўтказилган. Эмомали Раҳмон касаба уюшмалари ишчиларнинг меҳнат ҳуқуқларининг ҳимояси, барча корхоналардаги санитар-гигиеник ҳолатини ва меҳнат муҳафазаси шароитларининг жамоатчилик назоратини олиб бориши зарурлигини қайд этди. У охирги икки йил ичида ишлаб чиқариш фаолиятида 196 та бахтсиз ҳодиса юз бергани ва уларда 47 нафар одам ҳалок бўлганлигини маълум қилди.

Меҳнат шароитларини яхшилаш ва ишчиларга муносиб шароит яратиш бахтсиз ҳодиса юз берганидан кейин уларга компенсация тўлашдан анча арзонга тушади. Касаба уюшмалари ҳар бир ташкилот, корхонада меҳнат муҳофазаси ва ишчиларнинг тиббиёт ҳақидаги кўникмаларини яхшилаш юзасидан ишларни ташкиллаштириши лозим.

Эмомали Раҳмон, Тожикистон президенти

Шунингдек, президент иқтисодиётнинг турли соҳаларида ишчиларга ойлик маошларини беришда қарздорлик мавжудлигини айтди ва бу масаланинг мамлакат ҳукумати, масъул раҳбарлар ва профессионал иттифоқларнинг диққат-эътиборида эканлигига урғу берди.Раҳмон касаба уюшмаларини ишчилар ва уларнинг оила аъзоларининг соғлиғини яхшилашда фаол бўлишга чақирди. У ишчилар ва уларнинг оила аъзоларининг меҳнат таътили вақтида мароқли ҳордиқ чиқаришлари учун муносиб шароитлар яратишни тавсия қилди.