Инвестициялар ва ташқи савдо вазирлиги томонидан Тошкент вилояти ҳокимлиги билан биргаликда 25—26 октябрь кунлари Invest in Tashkent Region (IITR — «Тошкент вилоятига инвестиция киритинг») халқаро инвестицион форуми ташкил этилди. Нурафшон шаҳрида бўлиб ўтган форумнинг очилишида 40 дан ортиқ мамлакатдан келган 350 нафарга яқин меҳмон — ҳукумат делегациялари, институционал инвесторлар ва бизнес вакиллари иштирок этди.
Кузатувчиларнинг фикрича, ялпи ҳудудий маҳсулот ҳажмини сўнгги тўрт йил ичида икки баробарга оширишга муваффақ бўлган Тошкент вилояти иқтисодиётнинг реал секторида сармоя киритиш учун уникал майдон саналади.
«Қисқа муддатда шундай муҳим ва мураккаб тадбирни юқори даражада ташкил қила олганлигимиздан мамнунмиз. IITR 2019 форуми меҳмонларидан, шунингдек, Тошкент вилоятини турли бизнес манфаатларига эга бўлган, аммо минтақамизга бир хил мақсадда инвестиция киритаётган юзлаб одамлар учун жалб қилиш марказига айлантираётган ҳамкорларимиздан миннатдормиз. Ўйлайманки, ушбу инвестфорум энди анъанага айланади, чунки хорижий делегатлардан шундай таклифларни кўп эшитдик», — деди Тошкент вилояти ҳокими ўринбосари Жамшид Абдусаломов.
Очилиш маросимидан сўнг форум иштирокчилари Чимён тоғ-курорт мажмуаларида «Саноат», «Қишлоқ хўжалиги» ва «Туризм» йўналишлари бўйича ишни давом эттирди. IITR 2019 форумининг биринчи куни 25 октябрь кечқурун битимларни имзолаш маросими билан якунланди.
Абдусаломовнинг таъкидлашича, IITR форуми ишчи сессияларининг натижаларига кўра тузилган шартномаларнинг умумий суммаси 1 миллиард доллардан ошди.
«Бу илк ҳудудий инвестфорум учун яхши натижа деб ҳисоблайман. Инвестицион муҳитни ривожлантириш саъй-ҳаракатларини децентрализация қилиш бўйича Ўзбекистон раҳбариятининг ташаббуслари ўзини тўлиқ оқлаётгани бугун ҳар томонлама кўринди. Ўзбекистон вилоятларининг бошқа давлатларнинг бизнес доиралари ва минтақавий маъмуриятлари билан бевосита алоқалари иқтисодиётда янада тезкор ва маҳсулдор ҳамкорликка ёрдам беради», — деди у.
IITR 2019 халқаро инвестицион форумининг иккинчи кун дастури меҳмонларнинг Тошкент вилояти саноат ва маданий-тарихий объектларига ташриф буюришини кўзда тутади.
Изоҳ (0)