Бир муддат аввал блогер Дима Қаюмнинг Риштон бозорида кутубхона (китоб дўкони) қуришига қарши бўлган бир гуруҳ аёллар уни «самосуд» қилгани билан боғлиқ видео тарқалган эди. Воқеа сенатор Иқбол Мирзо Риштонга бориб, бозордаги янги қуриладиган кутубхона учун рамзий ғишт қўйиб берганининг эртасига — 14 октябрь куни юз берган эди.

17 октябрь куни Риштон тумани ИИБ Ҳуқуқбузарликлар профилактикаси бўлими томонидан Дима Қаюмга қарши қаратилган воқеага иштирок этган аёллар билан терговолди суриштирув ишлари олиб борилаётгани маълум бўлганди. Фарғона вилояти ҳокимлиги матбуот котиби Муҳаммаджон Обидовнинг 25 октябрь куни «Дарё» мухбири Мусулмонбек Иброҳимовга маълум қилишича, блогер Дима Қаюмга таҳдид қилган аёллар маъмурий жавобгарликка тортилган (аёлларга нисбатан айнан қандай чоралар белгилангани очиқланмаган).

Муҳаммаджон Обидовнинг қўшимча қилишича, юз берган воқеалардан сўнг Фарғона вилояти ҳокими Шуҳрат Ғаниев шахсан ўзи Риштонга борган ва Дима Қаюм билан учрашиб, рамзий ғишт қўйилган кутубхона қурилишига ўзи кафил бўлишини маълум қилган. Бундан ташқари, Ахборот ва оммавий коммуникациялар агентлиги директори Комил Алламжонов Риштон бозоридаги кутубхона қурилиши учун маблағ ажратилишини маълум қилган.

Рамзий ғишт қўйилган ерни Дима Қаюмнинг кутубхонаси қурилиши учун бериш бўйича Риштон тумани ҳокимининг қарори чиққан. Қайд этишларича, қурилажак янги китоб дўкони ҳокимлик балансида бўлади.