Бухородаги «Оила» илмий-амалий марказида «Бўлғуси келин-куёвлар инновацион мактаблари» фаолиятини оммалаштириш мақсадида ўтказилган пресс-тур иштирокчилари дастлаб марказ билан танишди. Бу ҳақда «Дарё» мухбири Лайло Ҳайитова хабар бермоқда.
Марказ ишга туширилиши учун 1 миллиард 833 миллион сўм сарфланган. Мазкур марказ Бухоро тиббиёт коллежи ҳузурида алоҳида бинода жойлашган бўлиб, моддий-техник база билан таъминланган. Ҳар бир хона замонавий русумдаги моноблокли компьютерлар билан жиҳозланган. Тингловчилар учун кутубхона, овқатланиш хоналари мавжуд. Ўқув жараёнларига 5 нафар ўқитувчи-профессор ва фан номзодлари ҳамда 6 нафар тажрибали эксперт-тренер жалб этилган. Инновацион мактабнинг мавжуд 13 та туман, шаҳар бўлимлари негизида 62 нафар тажрибали амалиётчи тренерлар, психология ва тиббиёт соҳаси мутахассислари, диншунослар машғулотлар олиб боришади.
Маълумотга кўра, вилоятда оилалар сони 503 155 та бўлиб, шундан 176 586 таси ёш оиладан иборат. Намунали оилалар 340 701 та, ибратли оилалар эса 16 200 тани ташкил этади.
— «Оила» илмий-амалий маркази томонидан олиб борилаётган ишлар бўлғуси оилаларнинг бахтли яшаб кетиши учун пойдевор бўлибгина қолмасдан, низоли ва ажрим ёқасидаги оилаларнинг бахтли яшаб кетишлари учун ҳам аҳамият касб этмоқда. Олиб борилган 273 та тарғибот-ташқиқот ишида 1254 та низоли оила яраштирилиб, 1866 нафар вояга етмаган бола етимликдан асраб қолинди. 809 та нотинч оиланинг 139 таси соғлом муҳитга қайтарилган бўлса, 243 та оиланинг 139 таси ночорликдан чиқарилди. 55 та ижтимоий ҳимояга муҳтож оилага ёрдам кўрсатилди, — дейди «Оила» илмий-амалий маркази ҳудудий бўлими раҳбари Абера Ҳусейнова. — Бу маълумотлар шунчаки хўжакўрсинга эмас, ёш оилалар ва бўлғуси оилаларнинг тинч ва фаровон, ажримсиз умргузаронлик қилиб кетиши йўлида бажарилган амалларнинг дебочасидир.
Мазкур мактабларда янги оила остонасида турган, ФХДЁга ариза берган бўлажак келин-куёвларга 16 соатлик дарс ўтилади. Уларга ҳаёт психологияси, оила бюджети ва иқтисоди, диний ва ахлоқий тарбия, репродуктив саломатлик ва ҳуқуқий муносабатлар, муомалада маданиятидан сабоқ берилади.
— 16 соатга мўлжалланган дарсларнинг учинчи кунидамиз. Шу уч кун ичида оилавий ҳаётнинг турли кўринишларига ҳали тайёр эмаслигимиз, бахтли яшаб кетишимиз учун ҳали биз билмаган ва ҳис қилмаган поғоналар борлигини кўряпмиз. Ҳатто оилавий масалаларда билимимиз ҳам жуда озлигини тушуниб етдик. Тўғри, биз қайсидир бегона оилага жуфтимиз учун борамиз. Аммо турмуш фақатгина мен ёки бўлғуси умр йўлдошимнинг қарори билан мустаҳкам бўлмаслигини, ортимизда ҳар икки оила вакилларининг ҳам ўрни, таъсири борлигини англаяпмиз. Ўйлаймизки, мактаб сабоғи бўлғуси оиламизнинг мустаҳкамлигини кафолатлай олади. Сабоқлар фақатгина 16 соат эмас, балки ундан-да кўпроқ бўлишини истардик, — дейди Маъруфжон Наримонов билан турмуш қуриш остонасида турган Хурсанд Комилова.
Пресс-турда «Бўлғуси келин-куёвлар инновацион мактаблари» лойиҳасининг мазмун-моҳияти, амалиётларнинг самараси ҳақида сўз борди. Иштирокчилар соҳа мутахассислари билан ўтказилган давра суҳбатида ўзларини қизиқтирган саволларга жавоб олишар экан, уларга марказ томонидан олиб борилган сабоқларда қатнашган ва турмуш қурган оилаларнинг бирортасида ажрим ҳолати кузатилмагани маълум қилинди. Инновацион марказда вилоят бўйича жами 1500 жуфтлик таҳсил олган ва улар ажримсиз, низосиз яшаб келмоқда. Қайд этилишича, жорий йилда вилоятда 10179 та никоҳ, 1349 та ажрим кузатилган. Ушбу ажримларнинг бирортаси инновацион марказ сабоқларида бўлмаган.
— Келиним ва ўғлим шу мактаб сабоғини олишди. Аввалига бор-йўғи 16 соатлик дарсликлардан нимани ҳам ўрганишарди, деган ўйга борганимизни ҳам яширмаймиз. Аммо келинимнинг нафақат мен ва қайнотаси, балки қайнсингил, қайнилар, овсинлару қўни-қўшнилар билан ҳам муомаласини кўриб, кўнглим кўтарилади. Ўғлим ҳам қайнона, ҳам ўз жуфтини бир кафтда кўтариб келишни уддалай олаётгани шу сабоқларнинг меваси, деб биламан. Аммо ўзим гоҳида айрим бир чигалликларга дуч келаман, тўғриси, қайнона бўлсам ҳам маслаҳатга муҳтож бўлиб қоламан. Шу ўринда қайноналар мактаби ҳам керакдир балки, деб қоламан, — дейди Бухоро шаҳрилик қайнона Субҳидам Насриева.
Тадбирда Бухорода энди «Бибихоним» қайноналар мактаби фаолияти ҳам йўлга қўйилиши билдирилди. Белгиланган сабоқларни якунлаган бўлғуси ёш келин-куёвларга инновацион мактабнинг битирувчилари сифатида сертификатлар тақдим этилди.
Маълумот учун, ҳозирга қадар республиканинг барча вилоят ва туман марказларида 137 та инновацион мактаб фаолият олиб бормоқда. Уларнинг фаолиятига 400 нафардан зиёд мутахассис жалб этилиб, 18 мингга яқин жуфтлик ўқитилган.
Изоҳ (0)