Самарқанд вилоятидаги юқумли касалликлар клиник шифохонасида бюджет маблағлари ўзлаштириш йўли билан талон-торож қилиш ҳолати аниқланди. Бу ҳақда Бош прокуратура матбуот котиби Ҳаёт Шамсутдинов маълум қилди.
Маълум бўлишича, Самарқанд вилояти юқумли касалликлар клиник шифохонаси томонидан электрон давлат харидлари порталига ҳар бирининг нархи 5 миллион сўмдан бўлган 10 дона (35 миллион сўмлик) «G» маркали кондиционер харид қилиш бўйича хусусий корхона билан электрон шартнома расмийлаштирилган.
Бироқ хусусий корхона томонидан «G» маркали кондиционерлари ўрнига, нархи 2 миллион 425 минг сўм бўлган 10 дона (24 миллион 425 минг сўмлик) «А» русумли кондиционерлар олиб келиб ўрнатилиб, жами 10 миллион 575 минг сўмлик бюджет маблағлари ўзлаштириш йўли билан талон-торож қилинган.
Бундан ташқари, шифохонада 31 ҳолатда жами 58 миллион 305 минг сўмлик дори воситалари қиммат нархларга харид қилиниб, анча миқдордаги бюджет маблағлари растрата йўли билан талон-торож қилинганлиги аниқланган.
Мазкур ҳолат юзасидан Самарқанд шаҳар прокуратураси томонидан вилоят юқумли касалликлар клиник шифохонаси мансабдор шахслари ва бошқаларга нисбатан Жиноят кодексининг 167-моддаси 2-қисми «г» банди (Айбдорга ишониб топширилган ёки унинг ихтиёрида бўлган ўзганинг мулкини мансаб мавқейини суиистеъмол қилиш йўли билан ўзлаштириш ёки растрата қилиш йўли билан талон-торож қилиш) билан жиноят иши қўзғатилган.
Ушбу моддада энг кам ойлик иш ҳақининг 100 бараваридан 300 бараваригача миқдорда жарима ёки 480 соатгача мажбурий жамоат ишлари ёки 2 йилгача ахлоқ тузатиш ишлари ёхуд 2 йилдан 5 йилгача озодликни чеклаш ёки 5 йилгача озодликдан маҳрум қилиш жазоси белгиланган
Тергов ҳаракатлари олиб борилмоқда.
Изоҳ (0)