Жаҳон банки томонидан 24 октябрь куни эълон қилинган Doing Business 2020 рейтингида Ўзбекистон 190 та давлат ичида 69-ўринни эгаллади. Мамлакат ўтган йилги рейтингга нисбатан 7 поғонага кўтарилиб, Индонезия ва Люксембургни ортда қолдирди.
Европа ва Марказий Осиё минтақасидаги бошқа тўртта давлат, шу жумладан, Тожикистон, Озарбайжон, Қирғизистон ва Косово билан бирга Ўзбекистон ишбилармонлик муҳитини яхшилашда энг яхши натижаларга эришган 20 мамлакат қаторига кирди.
Рейтингнинг дастлабки ўнталигига Янги Зеландия, Сингапур, Гонконг, Дания, Корея Республикаси, АҚШ, Грузия, Буюк Британия, Норвегия ва Швеция кирган. Рейтинг етакчиларида бизнесини рўйхатдан ўтказиш ва мулкни бошқа бировга беришда онлайн тизим йўлга қўйилган ҳамда солиқ декларациясини топширишда ҳам электрон платформа ишга туширилгани қайд этилган.
Рейтингнинг тўлиқ рўйхати билан қуйидаги ҳавола орқали танишиш мумкин.
Эслатиб ўтамиз, Президент Шавкат Мирзиёев 2018 йилнинг ёзида Doing Business’да Ўзбекистоннинг рейтингини ошириш тўғрисида қарор имзолаган эди. Молия вазири ўринбосари Одил Исоқов ушбу рейтинг бўйича яхши натижаларга эришилса, хорижий инвесторларни жалб қилишга ёрдам беришини айтганди.
Изоҳ (0)