Samarqand viloyatidagi yuqumli kasalliklar klinik shifoxonasida budjet mablag‘lari o‘zlashtirish yo‘li bilan talon-toroj qilish holati aniqlandi. Bu haqda Bosh prokuratura matbuot kotibi Hayot Shamsutdinov ma’lum qildi.
Ma’lum bo‘lishicha, Samarqand viloyati yuqumli kasalliklar klinik shifoxonasi tomonidan elektron davlat xaridlari portaliga har birining narxi 5 million so‘mdan bo‘lgan 10 dona (35 million so‘mlik) “G” markali konditsioner xarid qilish bo‘yicha xususiy korxona bilan elektron shartnoma rasmiylashtirilgan.
Biroq xususiy korxona tomonidan “G” markali konditsionerlari o‘rniga, narxi 2 million 425 ming so‘m bo‘lgan 10 dona (24 million 425 ming so‘mlik) “A” rusumli konditsionerlar olib kelib o‘rnatilib, jami 10 million 575 ming so‘mlik budjet mablag‘lari o‘zlashtirish yo‘li bilan talon-toroj qilingan.
Bundan tashqari, shifoxonada 31 holatda jami 58 million 305 ming so‘mlik dori vositalari qimmat narxlarga xarid qilinib, ancha miqdordagi budjet mablag‘lari rastrata yo‘li bilan talon-toroj qilinganligi aniqlangan.
Mazkur holat yuzasidan Samarqand shahar prokuraturasi tomonidan viloyat yuqumli kasalliklar klinik shifoxonasi mansabdor shaxslari va boshqalarga nisbatan Jinoyat kodeksining 167-moddasi 2-qismi “g” bandi (Aybdorga ishonib topshirilgan yoki uning ixtiyorida bo‘lgan o‘zganing mulkini mansab mavqeyini suiiste’mol qilish yo‘li bilan o‘zlashtirish yoki rastrata qilish yo‘li bilan talon-toroj qilish) bilan jinoyat ishi qo‘zg‘atilgan.
Ushbu moddada eng kam oylik ish haqining 100 baravaridan 300 baravarigacha miqdorda jarima yoki 480 soatgacha majburiy jamoat ishlari yoki 2 yilgacha axloq tuzatish ishlari yoxud 2 yildan 5 yilgacha ozodlikni cheklash yoki 5 yilgacha ozodlikdan mahrum qilish jazosi belgilangan
Tergov harakatlari olib borilmoqda.
Izoh (0)