22 октябрь куни Тошкент давлат юридик университетида «Адолат» СДП сайловолди дастури муҳокамасига бағишланган «Коррупцияга қарши курашиш – партия сайловолди дастуридаги устувор йўналиш» мавзусида экспертлар, фаоллар билан учрашув ўтказилди. Тадбирда партиянинг ушбу йўналиши бўйича экспертлар гуруҳи аъзолари, Қонунчилик палатаси депутатлари, Адлия вазирлиги вакиллари, университет профессор ўқитувчилари ва фаоллар иштирок этди.
Жорий йилнинг декабрь ойида Олий Мажлис Қонунчилик палатаси ва халқ депутатлари маҳаллий Кенгашларига сайловлар бўлиб ўтади. Ушбу сайловга тайёргарлик кўриш мақсадида ҳар бир партия ўзининг сайловолди дастурини ишлаб чиқади. Жумладан, Ўзбекистон «Адолат» социал-демократик партияси ҳам сайловолди дастури лойиҳасини ишлаб чиққан ва кенг миқёсда унинг муҳокамасини ўтказиб келмоқда.
Учрашувда дастурнинг коррупцияга қарши курашга оид йўналиши кенг муҳокама этилиб, ушбу тизимдаги ислоҳотлар натижаси таҳлил этилди. Хусусан, соҳада аҳолининг норозилигига сабаб бўлаётган омиллар танқидий ўрганилди.
Хусусан, кўплаб фуқаролар томонидан коррупцияни ислоҳотларни ҳаётга самарали татбиқ этилишига тўсиқ бўлаётган энг асосий иллат сифатида эътироф этишди. Бугунги кунда ҳар қандай соҳада ушбу хавфни учратиш мумкин. Бу эса коррупцияга қарши курашда энг аввало тизимли чора-тадбирларни белгилаш лозимлиги қайд этилди.
Ушбу тадбирдан кўзланган мақсад ҳам мавжуд камчиликларни аниқлаш, қонунларга ўзгартиш ва қўшимчалар киритиш, камчиликларни янги қонунлар ишлаб чиқиш орқали бартараф этиш, ҳалқимиз фаровонлигини ошириш, қонун устуворлигини таъминлаш, инсон ҳуқуқ ва манфаатларини ҳимоя қилишга хизмат қилишдир.
Партия сайловолди дастурига Ўзбекистонни ҳар соҳада ривожлантиришда энг аввало коррупцияни келтириб чиқарувчи омилларни бартараф этиш лозимлиги қайд этилган. «Адолат» СДП бу бўйича фақатгина давлат идоралари ташаббуси билан бирор натижага эришиб бўлмайди деб ҳисоблайди. Шунинг учун ушбу жараёнга халқимизни ҳам жалб этиш ҳамда уларнинг бу каби ҳолатларни маълум қилганида рағбатлантириш ва дахлсизлик ҳуқуқини кучайтириш лозим.
Экспертлар ўз таклифларида коррупцияга қарши курашни энг аввало адолатни таъминлашга хизмат қилувчи ташкилотлар - ҳуқуқни муҳофаза қилувчи идоралар ва давлат бошқарув органларидан бошлаш кераклигини таъкидлашди. Зеро мазкур идораларнинг ўзида бу иллатнинг учраши аҳолида давлатга нисбатан ишончсизлик, ислоҳотларга нисбатан норозилик кайфиятини шакллантириши ҳеч кимга сир эмас.
Шунингдек, фаоллар томонидан ушбу соҳада маълум бир ишлар амалга оширилаётганига қарамай «Коррупцияни қабул қилиш индекси»да мамлакатимиз рейтинги пастлигича қолаётгани қайд этилди. Шу боисдан коррупцияга қарши кураш билан биргаликда унинг натижасини ҳам кенг жамоатчиликка ва халқаро ташкилотларга тўлиқ етказиб бериш ҳам устувор йўналишлардан бирига айланиши кераклиги эътироф этилди.
Сўзга чиққанлар томонидан билдирилганидек, қатор олий таълим муассасаларида коррупция ва таъмагирлик ҳолатлари ҳамон сақланиб қолмоқда. Кириш имтиҳонлари, айниқса ижодий имтиҳонларда таниш–билишчилик, коррупция ва таъмагирлик ҳолатлари кўзга ташланмоқда.
Ушбу муаммоларни бартараф этиш, сайловолди дастурига олий таълим муассасаларига киришни осонлаштириш, олий маълумотлилар сафини кенгайтириш мақсадида олий таълим муассасаларига қабул квотасини бекор қилиш таклифи ҳам илгари сурилди.
Партия экспертлари томонидан бу каби таклифлар эътиборга олиниши таъкидланди.
Учрашувда иштирокчилар мавзу юзасидан ўз фикр-мулоҳазаларини билдирдилар. Партия сайловолди дастурига таклифлар ўртага ташланди. Ҳужжатнинг айрим бандларини таҳрир қилиш лозимлиги асослаб кўрсатилди. Якунда хулосалар умумлаштирилиб, партия сайловолди дастурида акс эттирилиши белгиланди.
«Адолат» СДП матбуот хизмати
Реклама ҳуқуқи асосида.
Изоҳ (0)