22-oktabr kuni Toshkent davlat yuridik universitetida “Adolat” SDP saylovoldi dasturi muhokamasiga bag‘ishlangan “Korrupsiyaga qarshi kurashish – partiya saylovoldi dasturidagi ustuvor yo‘nalish” mavzusida ekspertlar, faollar bilan uchrashuv o‘tkazildi. Tadbirda partiyaning ushbu yo‘nalishi bo‘yicha ekspertlar guruhi a’zolari, Qonunchilik palatasi deputatlari, Adliya vazirligi vakillari, universitet professor o‘qituvchilari va faollar ishtirok etdi.
Joriy yilning dekabr oyida Oliy Majlis Qonunchilik palatasi va xalq deputatlari mahalliy Kengashlariga saylovlar bo‘lib o‘tadi. Ushbu saylovga tayyorgarlik ko‘rish maqsadida har bir partiya o‘zining saylovoldi dasturini ishlab chiqadi. Jumladan, O‘zbekiston “Adolat” sotsial-demokratik partiyasi ham saylovoldi dasturi loyihasini ishlab chiqqan va keng miqyosda uning muhokamasini o‘tkazib kelmoqda.
Uchrashuvda dasturning korrupsiyaga qarshi kurashga oid yo‘nalishi keng muhokama etilib, ushbu tizimdagi islohotlar natijasi tahlil etildi. Xususan, sohada aholining noroziligiga sabab bo‘layotgan omillar tanqidiy o‘rganildi.
Xususan, ko‘plab fuqarolar tomonidan korrupsiyani islohotlarni hayotga samarali tatbiq etilishiga to‘siq bo‘layotgan eng asosiy illat sifatida e’tirof etishdi. Bugungi kunda har qanday sohada ushbu xavfni uchratish mumkin. Bu esa korrupsiyaga qarshi kurashda eng avvalo tizimli chora-tadbirlarni belgilash lozimligi qayd etildi.
Ushbu tadbirdan ko‘zlangan maqsad ham mavjud kamchiliklarni aniqlash, qonunlarga o‘zgartish va qo‘shimchalar kiritish, kamchiliklarni yangi qonunlar ishlab chiqish orqali bartaraf etish, halqimiz farovonligini oshirish, qonun ustuvorligini ta’minlash, inson huquq va manfaatlarini himoya qilishga xizmat qilishdir.
Partiya saylovoldi dasturiga O‘zbekistonni har sohada rivojlantirishda eng avvalo korrupsiyani keltirib chiqaruvchi omillarni bartaraf etish lozimligi qayd etilgan. “Adolat” SDP bu bo‘yicha faqatgina davlat idoralari tashabbusi bilan biror natijaga erishib bo‘lmaydi deb hisoblaydi. Shuning uchun ushbu jarayonga xalqimizni ham jalb etish hamda ularning bu kabi holatlarni ma’lum qilganida rag‘batlantirish va daxlsizlik huquqini kuchaytirish lozim.
Ekspertlar o‘z takliflarida korrupsiyaga qarshi kurashni eng avvalo adolatni ta’minlashga xizmat qiluvchi tashkilotlar - huquqni muhofaza qiluvchi idoralar va davlat boshqaruv organlaridan boshlash kerakligini ta’kidlashdi. Zero mazkur idoralarning o‘zida bu illatning uchrashi aholida davlatga nisbatan ishonchsizlik, islohotlarga nisbatan norozilik kayfiyatini shakllantirishi hech kimga sir emas.
Shuningdek, faollar tomonidan ushbu sohada ma’lum bir ishlar amalga oshirilayotganiga qaramay “Korrupsiyani qabul qilish indeksi”da mamlakatimiz reytingi pastligicha qolayotgani qayd etildi. Shu boisdan korrupsiyaga qarshi kurash bilan birgalikda uning natijasini ham keng jamoatchilikka va xalqaro tashkilotlarga to‘liq yetkazib berish ham ustuvor yo‘nalishlardan biriga aylanishi kerakligi e’tirof etildi.
So‘zga chiqqanlar tomonidan bildirilganidek, qator oliy ta’lim muassasalarida korrupsiya va ta’magirlik holatlari hamon saqlanib qolmoqda. Kirish imtihonlari, ayniqsa ijodiy imtihonlarda tanish–bilishchilik, korrupsiya va ta’magirlik holatlari ko‘zga tashlanmoqda.
Ushbu muammolarni bartaraf etish, saylovoldi dasturiga oliy ta’lim muassasalariga kirishni osonlashtirish, oliy ma’lumotlilar safini kengaytirish maqsadida oliy ta’lim muassasalariga qabul kvotasini bekor qilish taklifi ham ilgari surildi.
Partiya ekspertlari tomonidan bu kabi takliflar e’tiborga olinishi ta’kidlandi.
Uchrashuvda ishtirokchilar mavzu yuzasidan o‘z fikr-mulohazalarini bildirdilar. Partiya saylovoldi dasturiga takliflar o‘rtaga tashlandi. Hujjatning ayrim bandlarini tahrir qilish lozimligi asoslab ko‘rsatildi. Yakunda xulosalar umumlashtirilib, partiya saylovoldi dasturida aks ettirilishi belgilandi.
“Adolat” SDP matbuot xizmati
Reklama huquqi asosida.
Izoh (0)