Жамиятда нимаики муҳим ҳодиса рўй берса, ижтимоий тармоқлар ва оммавий мессенжерлар уни нишонга оляпти. Бир ҳафта дунёдан узилиб қолган ўзбекистонлик ҳам, мана масалан, бизнинг Telegram-каналимизни титкилаб чиқса, ижтимоий ҳодисалардан хабардор ҳар қандай одам билан тенг маълумотга эга бўлади.

Telegram’да сўровномалар ўтказиш оммалашиб кетди. Бир мавзу бўйича турли «отахон» каналларда ўтказилган сўровномаларни йиғиб, материал тайёрлашни илгари ҳам тажриба қилиб кўрган эдик. Келинг, бу гал яна уриниб кўрамиз. Навбатдаги нишон – декабрь ойида бўлиши кутилаётган парламент сайлови.

Хабарингиз бор, декабрь ойида парламентга сайловлар кутиляпти. Партиялар қизғин ташвиқотларни бошлаб юборди. Telegram’да ҳам шу мавзу трендда. Турли каналлар бу мавзуга турлича муносабат билдирмоқда. Қуйида мисоллар келтирамиз:

230 миллиард сўм = 24 миллион доллар – Партиялар сайловига бюджетдан шунча пул ажратилар экан.

Бу пулга:

2 400 бола ўқиши мумкин бўлган энг замонавий мактаб ёки 5 000–10 000 киши ўқиши мумкин бўлган ўзимиз ўрганган мактаблар; ;)

1 000–15 00 оила учун хонадонлар;

3 500 та Spark автомашинаси;

2 300 тадбиркорга 100 миллион сўмдан кредит;

230 000 оилага 1 миллион сўмдан моддий ёрдам;

ҳеч бўлмаса минглаб ойлиги берилмаётганларнинг меҳнат қилиб топган ҳақини бериш мумкин эди...

Ҳисоб-китоблар тахминий, чунки ҳали бери ваъда қилинган «Очиқ бюджет» лойиҳасини кўрмадик ва қаерга қанча бизнинг маблағларимиз сарфланишини билмаймиз.

Ҳа-я, 230 миллиард сўмга тахминан 2 миллиард дона қизил аччиқ қалампир сотиб олса бўлади. Шунда баъзиларнинг ишлаш унумдорлигини ошади, менимча. ?

@trolluz

Сайтимизнинг ҳаммага таниш фотограф хоними Мадина Нурман ўз Telegram-каналида кичик сўровнома ўтказибди.

Скрин: «Дарё»

Шунингдек, у сайлов кампаниясига бевосита алоқадор кишилар учун «жестлар» борасида қўлланма ҳам тақдим қилди.

Скрин: «Дарё»

Элдар Асанов ҳам каналида шахсан ўзи ЎзЛиДеП раиси билан қилган суҳбатини эълон қилди. Суҳбат сайтимизда ҳам видео ва матнли шаклда эълон қилинди. «Кўп гўшт ейиш мавзуси эсингиздами? Шу гаплари билан машҳур бўлган Актам ака Ҳайитов билан интервью қилдик. Хайп мавзу туфайли шуҳрат топганларига қарамай, менда ақлли ва оғир-босиқ киши сифатида таассурот қолдирди», деб ёзади Элдар ака.

Яна бир хабарлар сайтининг Telegram-каналида ҳам қайси партияга овоз бериш масаласида сўровнома ўтказилди. Иштирокчиларнинг 53 фоизи ҳеч қайси партияга овоз бермоқчи эмас экан.

Скрин: «Дарё»

Ҳуқуқшунос ва блогер Хушнудбек ўз каналида эълон қилган сўровнома иштирокчиларининг 34 фоизи ҳеч қайси партияга овоз бермоқчи эмас.

Скрин: «Дарё»

Худди шу сўровнома натижалари ҳақида бошқа бир блогер Нозим Сафари ўз каналида пост қолдирган:

Хушнуд Худайбердиев ўтказган сўровноманинг бир қизиқ жиҳати эътиборимни тортди. «Сайловларда қайси партияга овоз бермоқчисиз» саволига 34 мингга яқин респондент жавоб берган.

Партиялар ўртасида биринчи ўринни 25 фоиз овоз билан ЎзЛиДеП қўлга киритган. Иккида Миллий тикланиш (9 фоиз), учинчи ўринда Адолат (8 фоиз). Сўнгги икки позицияда ХДП (3 фоиз) ва Экопартия (3 фоиз). 14 фоиз овозни эса «Партияга эмас, номзодга боғлиқ» варианти қўлга киритган.

Энг қизиғи, энг кўп овозни «Ҳеч қайсисига» жавоби йиққан. 38 фоиз! Бу қарийб 13 минг одам биргина Telegram’нинг ўзида ҳеч қайси партияга овоз бермаслигини билдирган дегани. Жуда катта рақам. Нега одамларнинг аксариятида партияларга нисбатан ишончсизлик ўрнашган? Бунинг илдизи жуда чуқур. Фаол сайловлар бўлгани яхши. Ҳа. Лекин абсентеизмнинг бундай юқори даражаси партиявийлик тизими легитимлигини гумон остида қолдиради.

Кучли давлатнинг кучли парламенти бўлиши керак. Давлат суянадиган учоёқнинг бири парламентаризм. Қолган иккиси суд ва ижро. Оёқлар баланси ўзаро йўқотилса, муаммолар кўпайгандан кўпаяверади. Битта ҳал этилган муаммо олдидан учта янгиси ўсиб чиқаверади. Улар ўртасидаги мувозанатгина давлатни ва жамиятни дзен нуқтасига чиқаради.

Ўзбекистонга кучли парламент, кучли партиялар керак. Ғўзапоялар билан қуролланиб, бир бирига пахта отиб, ваҳшатли муҳораба уюштирмайдиган партиялар керак. Ғоялар кураши керак, майда маишатчилик эмас. Қонунчилик ва назоратни тўлиқ қўлга ола биладиган мустақил механизм керак.

Халқ партияларга суянади. Ҳозирда эса суянчиғини ёқотгандек гўё. Халқ зеҳнида аполитизм баланд. Эски даврлар руҳияти аримаган. Жамоатчилик ҳам бир қадам олдинга ташлаб юртимизда бўлаётган сиёсий жараёнларга қизиқа бошлаши керак. Шунда сайловда партиясига қараб эмас номзодига қараб муносиблар депутат бўлса ҳам бир нави.

Яна кўплаб Telegram-каналларда қуйидаги расм айланиб юрибди. Бу қизлар ҳақидаги муҳокамаларга эса тўхталишнинг, менимча, ҳожати бўлмаса керак.

Скрин: «Дарё»

Қабристонда ўрнатилган «Адолат» ҳам кўпчиликнинг асабига тегиб улгурди.

Скрин: «Дарё»

Кўпгина депутатларнинг тушираётган қовунлари-ю яна бошқаларининг кўрсатаётган фидойиликлари қайсидир партияни обрўсизлантирса, бошқасини кўкка кўтаряпти. Бир каналда айтилганидек, Экопартияга буларнинг қизиғи йўқ. Биз эса партияларга кутилаётган сайловларда омад тилаб қоламиз.

Дилбар Исматуллаева тайёрлади.