Green Card mavsumi boshlanishi munosabati bilan “Daryo” muxbiri Dilbar Ismatullayeva Telegram messenjerining aholining nisbatan “jiddiy”, ziyoli qatlamini qamrab olgan kanallarida turli shaklda so‘rovnomalar tashkil etdi. So‘rovnoma o‘tkazishda yaqindan yordam bergan kanal adminlariga rahmat degan holda natijalarni e’lon qilamiz.

Natijalar 4-oktabrga oid.

O‘zbekiston talabalarini eng keng tarzda qamrab olgan va rasmiy faoliyat olib boruvchi @TalabaUz  kanalida o‘tkazilgan so‘rovnoma natijalari quyidagicha:

Skrin: “Daryo”

Ko‘rib turganingizdek, so‘rovnomada ishtirok etgan talabalarning 33 foizi qat’iy “surish” fikriga kelgan bo‘lsa, yana 28 foizi yaqindagina xayolan amerikalikka aylangan. Qolgan 32 foiz vatanparvar do‘stlarimizni olqishlaymiz. 8 foiz “Green Card? Nima u?” javob variantini belgilaganlarga esa “uyat-uyat” deya olamiz xolos. Shu o‘rinda bir hazilomuz savol tug‘iladi: talabalar ketsa, maklerlarni kim boqadi?

Navbatdagi so‘rovnoma badiiy adabiyot ishqibozlarining ko‘pchiligi a’zo bo‘lgan “Iqtibos” kanalida o‘tkazildi. Natijalar bilan tanishing:

Skrin: “Daryo”

Kitobsevarlarning 29 foizi zudlik bilan ketish taraddudida bo‘lsa, qolgan 20 foizi ketolmasligidan afsusda. Bu janoblar kitob va hayot boshqa-boshqa masalaligini unutgan ko‘rinishadi.

Shu o‘rinda so‘rovnomalarga hukm sifatida qaramasligingizni so‘raymiz. Bu shunchaki eksperiment va uning natijalaridan xulosa qilishda har kim o‘z dunyoqarashidan kelib chiqadi.

Ko‘pchiligimiz yaxshi taniydigan @NurbekAlimov’dan ham o‘z Telegram-kanalida so‘rovnoma tashkillashtirib berishini iltimos qildik. Natijalar quyidagicha:

Skrin: “Daryo”

39 foiz odam Green Card o‘ynash niyatida. Buni qanday tushunish mumkin? Ha, topdingiz, bu qip-qizil noshukurlik!

Hazil o‘z yo‘liga, lekin so‘rovnoma maqsadli ravishda aholining (nisbatan) o‘qimishli qismi yig‘ilgan kanallarda o‘tkazildi. Har bir kanaldagi 30–40 foiz foydalanuvchi samolyot chiptasini qo‘liga tutqazgudek bo‘lsangiz, ertagayoq jo‘nab ketish kayfiyatida.

Uchta so‘rovnomadan xulosa qiladigan ahmoq yo‘q deydiganlar uchun navbatdagi so‘rovnomalar natijalarini birin-ketin havola qilamiz:

Skrin: “Daryo”

Bu bola ismi miyangizga avtomatik tarzda kelgan G‘aniyev emas. U ijtimoiy tarmoqlarda “Doktor Shizoid” nomi bilan mashhur va doimiy ravishda o‘zining tibbiyotga aloqador qiziqarli va foydali maqolalarini e’lon qilib boradi. “Daryo”da ham uning bir nechta maqolalari e’lon qilingan (1, 2).

Sarvarning kanalida o‘tkazilgan so‘rovnoma natijalariga ko‘ra, 33 foiz a’zo “surmoqchi”, yana 8 foizi esa vatanparvarligini tan olgan.

Skrin: “Daryo”

Lingvistikaga qiziquvchilar uchun maxsus ensiklopediya deya bemalol e’tirof etish mumkin bo‘lgan “Asanov formati” o‘quvchilarining 32 foizi ketishga orzumand. Yana 14 foiz odam betaraf pozitsiyani ushlab turibdi.

Skrin: “Daryo”

Muhrimchilar” ham peshqadamlikni qo‘ldan berishmayapti. 37 foiz kanal a’zolari Green Card o‘ynash istagini bildirgan. Yana 12 foizlik jamoa “o‘ylab ko‘ryapti”.

O‘zining ajabtovur memlari bilan anchagina nazarga tushib qolgan “Nurqul minbari” kanalini ham ashaddiy noshukrlar makoni deyish mumkin ekan. Nega deysizmi? Mana, qarang:

Skrin: “Daryo”

Yakuniy xulosa qiladigan bo‘lsak:

- So‘rovnomalarda jami 11 269 kishi ishtirok etdi;

- So‘rovnoma ishtirokchilarining 4 393 nafari, ya’ni 39 foizi doimiy yoki ilk marotaba Green Card o‘yini ishtirokchilari;

- Ishtirokchilarning 8 foizi hali bu haqida o‘ylab ko‘rmagan;

- Yana bir qism ovoz beruvchilar afsusli yoki kinoyali variantlarni belgilagan.

Natijalarga e’tibor qaratganimizda shu ko‘rinadiki, ishtirokchilarning 40 foizga yaqinida Amerikaga ketish uchun moyillik bor. Albatta, bu so‘rovimiz butun O‘zbekistondagi kayfiyatni aks ettira olmaydi: birinchidan, O‘zbekistonda bir necha ming emas, o‘n millionlab odam yashaydi; ikkinchidan, hamma ham ijtimoiy tarmoqlarda o‘tirmaydi, yuqoridagi kanallarning esa o‘ziga xos auditoriyasi bor. Nima bo‘lganda ham, so‘rovnoma o‘tkazgan kanallarni o‘qiydigan qatlamning intellektual va ijtimoiy darajasini hisobga oladigan bo‘lsak, bu ko‘rsatkichdan bir qancha xulosalar qilib olsak bo‘ladi. Bunday xulosalar qilishni esa har kimning o‘ziga qoldiramiz.

Muallif fikri tahririyat nuqtai nazaridan farq qilishi mumkin.