Самарқанд вилоят ИИБ Паяриқда кореялик инвестор «калтаклангани» ҳақидаги видеога муносабат билдирди

Ижтимоий тармоқларда Самарқанд вилояти Паяриқ тумани Челак шаҳарчаси «Сўзангарон» савдо мажмуаси ёнида тадбиркорлик фаолияти билан шуғулланаётган жанубий кореялик тадбиркор Ким Жинг Бонг номидан хабар тарқалди. Унда кореялик фуқаро Челак шаҳрига инвестиция киритганлиги, аммо туманнинг айрим фуқаролари уни уриб Ўзбекистондан чиқариб юбормоқчи бўлаётганлигини билдирилган.

Мазкур ҳолат юзасидан Самарқанд вилоят ИИБ матбуот хизмати ўз муносабатини билдирди.

Маълум бўлишича, Next Constructionс фирмаси директори Элдор Мўминовга 2017 йилда Паяриқ тумани «Янги ҳаёт» маҳалласи Чолмўйин қишлоғи ҳудудида жойлашган «Шаҳзод Файз чорва» МЧЖ фермер хўжалиги ер майдони ҳудудидан иссиқхона қуриш учун 6 гектар ер ажратиб берилган.

Элдор Мўминов қишлоқ хўжалигини ривожлантириш борасида хорижий инвестициялар иштирокида ажратилган ер майдонида замонавий иссиқхона қуриш лойиҳасини тузган. Иссиқхона қурилиши учун мутахассис сифатида Корея фуқароси Ким Жинг Бонг жалб қилинган.

2019 йил 9 январдаги «Фермер хўжаликлари ва бошқа қишлоқ хўжалиги корхоналари ер майдонларини мақбуллаштириш ҳамда қишлоқ хўжалиги ерларидан самарали фойдаланишга доир қўшимча чора-тадбирлар тўғрисидаги» Вазирлар Маҳкамасининг 14-сонли қарорига асосан «Шаҳзод Файз чорва» МЧЖ фермер хўжалик раиси Улуғбек Аҳроровга кичик фермерлар ерлари бирлаштирилиб, жами 112,7 гектар ер майдони ғалла ва пахта экинлари етиштириш учун ажратилган.

Улуғбек Аҳроровга берилган ер майдонининг 1,6 гектари иссиқхона қурилиши учун ажратилган 6 гектар ер жойлашган майдоннинг атрофини ташкил қилган. Улуғбек Аҳроров ушбу 1,6 гектар иссиқхона атрофидаги ер майдонидан фойдаланмаган бўлса-да, йиллик солиқ тўловларини тўлаб келган. Шунингдек, туман ҳокимлиги томонидан фойдаланмаган ер майдонидан пахта режаси сўралган.

«Шаҳзод Файз чорва» МЧЖ фермер хўжалиги раисининг акаси бўлган Зуҳриддин Аҳроров ҳамда Шаҳзод Аҳматов жанжалга аралашиб, Баҳодир Хўжаевни бир неча маротаба юз қисмига уриб тан жароҳати етказган. Шу вақт давомида иссиқхона ишчилари ва маҳаллий аҳоли келиб уларнинг жанжалини ажратган ва шундан кейин жанжал тарқаган.

Ким Жинг Бонг мазкур воқеа содир бўлган вақтда унга ажратилган ҳайдовчи Усмон Қобилов билан биргаликда Самарқанд шаҳрида бўлган. Улар воқеа жойига жанжал тугаб бўлганидан сўнг етиб келган.

Фуқаро Баҳодир Хўжаев олган тан жароҳати юзасидан Паяриқ тумани ИИБ навбатчилик қисмига арз қилган. Ушбу ҳолат юзасидан Паяриқ тумани ИИБ томонидан терговга қадар текширув ҳаракатлари олиб борилмоқда.