Ijtimoiy tarmoqlarda Samarqand viloyati Payariq tumani Chelak shaharchasi “So‘zangaron” savdo majmuasi yonida tadbirkorlik faoliyati bilan shug‘ullanayotgan janubiy koreyalik tadbirkor Kim Jing Bong nomidan xabar tarqaldi. Unda koreyalik fuqaro Chelak shahriga investitsiya kiritganligi, ammo tumanning ayrim fuqarolari uni urib O‘zbekistondan chiqarib yubormoqchi bo‘layotganligini bildirilgan.
Mazkur holat yuzasidan Samarqand viloyat IIB matbuot xizmati o‘z munosabatini bildirdi.
Ma’lum bo‘lishicha, Next Constructions firmasi direktori Eldor Mo‘minovga 2017-yilda Payariq tumani “Yangi hayot” mahallasi Cholmo‘yin qishlog‘i hududida joylashgan “Shahzod Fayz chorva” MChJ fermer xo‘jaligi yer maydoni hududidan issiqxona qurish uchun 6 gektar yer ajratib berilgan.
Eldor Mo‘minov qishloq xo‘jaligini rivojlantirish borasida xorijiy investitsiyalar ishtirokida ajratilgan yer maydonida zamonaviy issiqxona qurish loyihasini tuzgan. Issiqxona qurilishi uchun mutaxassis sifatida Koreya fuqarosi Kim Jing Bong jalb qilingan.
2019-yil 9-yanvardagi “Fermer xo‘jaliklari va boshqa qishloq xo‘jaligi korxonalari yer maydonlarini maqbullashtirish hamda qishloq xo‘jaligi yerlaridan samarali foydalanishga doir qo‘shimcha chora-tadbirlar to‘g‘risidagi” Vazirlar Mahkamasining 14-sonli qaroriga asosan “Shahzod Fayz chorva” MChJ fermer xo‘jalik raisi Ulug‘bek Ahrorovga kichik fermerlar yerlari birlashtirilib, jami 112,7 gektar yer maydoni g‘alla va paxta ekinlari yetishtirish uchun ajratilgan.
Ulug‘bek Ahrorovga berilgan yer maydonining 1,6 gektari issiqxona qurilishi uchun ajratilgan 6 gektar yer joylashgan maydonning atrofini tashkil qilgan. Ulug‘bek Ahrorov ushbu 1,6 gektar issiqxona atrofidagi yer maydonidan foydalanmagan bo‘lsa-da, yillik soliq to‘lovlarini to‘lab kelgan. Shuningdek, tuman hokimligi tomonidan foydalanmagan yer maydonidan paxta rejasi so‘ralgan.
“Shahzod Fayz chorva” MChJ fermer xo‘jaligi raisining akasi bo‘lgan Zuhriddin Ahrorov hamda Shahzod Ahmatov janjalga aralashib, Bahodir Xo‘jayevni bir necha marotaba yuz qismiga urib tan jarohati yetkazgan. Shu vaqt davomida issiqxona ishchilari va mahalliy aholi kelib ularning janjalini ajratgan va shundan keyin janjal tarqagan.
Kim Jing Bong mazkur voqea sodir bo‘lgan vaqtda unga ajratilgan haydovchi Usmon Qobilov bilan birgalikda Samarqand shahrida bo‘lgan. Ular voqea joyiga janjal tugab bo‘lganidan so‘ng yetib kelgan.
Fuqaro Bahodir Xo‘jayev olgan tan jarohati yuzasidan Payariq tumani IIB navbatchilik qismiga arz qilgan. Ushbu holat yuzasidan Payariq tumani IIB tomonidan tergovga qadar tekshiruv harakatlari olib borilmoqda.
Izoh (0)