Ўзбекистон Ташқи ишлар вазирлиги Консуллик-ҳуқуқий департаменти Туркияда бўлиб турган ва ушбу мамлакатга кетишни режалаштираётган Ўзбекистон фуқароларини Туркия ҳудудига белгиланган меъёрдан кўпроқ миқдорда тамаки ва алкогол маҳсулотларини олиб кирмасликка чақирди. Бу ҳақда Ташқи ишлар вазирлиги ахборот хизмати хабар берди.
Қайд этилишича, Ташқи ишлар вазирлиги Консуллик-ҳуқуқий департаменти мамлакат фуқароларининг Туркия божхона ва чегара назорат пунктларида, жумладан аэропортларда Туркия ҳудудига белгиланган меъёрдан кўпроқ миқдорда тамаки ва алкогол маҳсулотларини олиб киришга уриниш фактлари бўйича қўлга олиниш ҳолатларга эътибор қаратган.
Хабар берилишича, Туркия ҳудудига белгиланган меъёрдан ортиқ тамаки ва алкогол маҳсулотларини олиб кирган шахсларга нисбатан Туркия Республикаси Жиноят кодекси «Контрабанда» моддаси бўйича жиноий иш очилади. Суд қарорига мувофиқ мазкур шахслар жиноий иш содир этган деб ҳисобланади ва уларга нисбатан олти йилгача озодликдан маҳрум қилиш ва маъмурий жарима тўлаш жазолари қўлланилади.
Суднинг якуний қарори чиққунга қадар Туркия ҳудудидан депорт қилинган ва суд ҳукмига кўра айбдор деб топилган шахслар Туркия ваколатли органларининг маълумотлар базасига қидирувдаги шахс сифатида киритилади ва давлат чегарасини кесиб ўтиш чоғида қўлга олинади.
Шу муносабат билан ТИВ Консуллик-ҳуқуқий департаменти Ўзбекистон фуқароларини тамаки, алкогол ва бошқа маҳсулотларни олиб кириш бўйича Туркиянинг божхона қоидаларига амал қилишга чақиради.
ТИВ томонидан маълум қилинишича, айни пайтда «Yolcular İçin Gümrük Rehberi» («Йўловчилар учун божхона йўлкўрсатгичи») мобил иловаси ишламоқда. Туркия томони ишлаб чиққан мазкур илова Туркияга келаётган ёки ундан чиқиб кетаётган чет эл фуқаролари учун амалдаги божхона қонунчилигига мувофиқ олиб кириш ва олиб чиқиш мумкин бўлган нарсалар, маҳсулотлар, пул ва қимматбаҳо буюмлар бўйича энг зарур маълумотлар билан тез танишиб чиқиш имконини беради.
«Yolcular İçin Gümrük Rehberi» мобил иловаси интернетга уланишни талаб қилмайди, автоном тартибда ишлайди ҳамда турк, инглиз, рус, немис ва араб тилларида маълумот тақдим этади. Иловани Google Play Store ва Apple Store’дан бепул юклаб олиш мумкин, дейилади ТИВ хабарида.
Ўзбекистон ТИВ ўз хабарига Туркия қонунчилигига мувофиқ айрим товарларни олиб кириш учун ўрнатлган меъёрларни илова қилган.
Туркия ҳудудига 18 ёшдан ошган фуқаролар томонидан божхона тўловларисиз олиб кириш мумкин бўлган маҳсулотлар:
Тамаки маҳсулотлари:
- Сигаретлар — 600 дона
- Сигариллалар (ҳар бир сигарилланинг оғирлиги 3 граммдан ошмаслиги керак) — 100 дона.
- Сигаралар — 50 дона.
- Кесилган тамаки (200 дона сигарет қоғози билан) — 250 грамм.
- Таркибида алкогол 22 фоиздан юқори бўлган алкогол ва алкогол ичимликлари — 1 литр.
- Таркибида алкогол 22 фоиздан кам бўлган алкогол ва алкогол ичимликлари — 2 литр.
- Максимум 600 миллилитр — ҳожатхона суви, одекалон, лаванда, атир ёки лосьон, тери учун 5 та восита, макияж учун восита.
- Чой — 1 килограмм
- Тайёр эрийдиган кофе — 1 килограмм
- Кофе — 1 килограмм
- Шоколад — 1 килограмм
- Шакардан тайёрланган озиқ-овқат маҳсулотлари — 1 килограмм
Изоҳ (0)