Тўрт йилдирки, чироқчилик тадбиркорлар адолат излайди. Бири «мен ҳақман»деса, иккинчиси «адолат мен томонда», дейди. Яна бири эса «туман ҳокими топшириғига билан ишлаб чиқаришни йўлга қўйгандим, бугунги кунга келиб эса боримдан айрилиб, банкрот бўлдим», дея шикоят қилади. Бунга на туман ва на вилоят ҳокимлиги масъуллари қулоқ тутади.
Таҳририятга мурожаат қилган тадбиркор Умида Мирзаеванинг ёзишича, ОАВ улар учун сўнгги умид. «Дарё» мухбири Отабек Қўлдошев умиди пучга чиқаётган тадбиркорлар арзига қулоқ тутди.
— 2015 йил 10 январь куни туманимизда тадбиркорлар иштирокида йиғилиш бўлиб ўтди, — дейди Умида Мирзаева. — Республикадан ишчи гуруҳи раҳбари сифатида келган Шавкат Жавлонов раислигида ўтган йиғилишда туманимизда саноат зонаси ташкил этиш таклиф қилинди. Анчадан бери бўш турган «Янги қурилиш» кўчасидаги собиқ болалар шифохонаси тадбиркорларга ишлаб чиқариш учун бериладиган бўлди. Туманнинг ўша пайтдаги раҳбари Равшан Комилов ишлаб чиқаришни йўлга қўймоқчи бўлган тадбиркорларга ҳудудни кўрсатиб, иш бошлашни таклиф қилди. 6 нафар тадбиркор туман ҳокими таклифига биноан иш бошладик.
2015 йил 13 март куни Равшан Комилов январь ойида бўлиб ўтган йиғилиш қарорига мувофиқ шифохона ҳудудидан юридик ва жисмоний шахсларга доимий фойдаланиш учун ер участкаларини бериш тўғрисида қарор чиқаради. Қарорда собиқ шифохона ҳудудининг 1,24 гектар майдони ва 2 та биноси 14 нафар тадбиркорга танлов асосида ишлаб чиқариш учун берилиши лозимлиги таъкидланади. Бироқ номаълум сабабларга кўра, танлов ўтказилмайди.
Маълум қилинишича, ўша пайтда бўш турган собиқ болалар шифохонаси 2,8 гектар майдонда жойлашган бўлиб, 1970 йили ҳашар йўли билан қурилган. Маълум муддат болалар ёзги оромгоҳи, сўнгра шифохона сифатида фойдаланилган. 2013 йилдан бери бўш ётган бино 2014 йил туман ободонлаштириш бошқармаси балансига ўтказилган.
Туман ҳокими таклифига биноан 6 нафар тадбиркор ишни бошлаб юборди. Кимдир нон ва нон маҳсулотлари, кимдир ширинликлар тайёрлай бошлади. Яна кимдир эса ўзи учун муносиб шароит ҳозирлаш илинжида эски ва қаровсиз биноларни таъмирлашга киришди. Хуллас, ҳоким айтди — тадбиркор бажарди.
Ушбу воқеалар бўлиб ўтаётган вақтда — 2015 йил 24 июль куни эса собиқ шифохона ҳудуди 2,8 гектар ер майдони ва 14 та биноси билан бирга вилоят ҳокими Зафар Рўзиев раислигида бўлиб ўтган тендер танловида «Чироқчи томорқа» МЧЖ томонидан «нол» қийматда сотиб олинди. Боиси 2014 йил 2 январь куни Чироқчи туман ҳокимлиги томонидан вилоят Давлат рақобат бошқармаси бошлиғига юборилган хатда собиқ болалар шифохонасини тумандаги бўш ётган бино сифатида тадбиркорларга «нол» балансда таклиф қилиниши лозимлиги сўралганди.
Бир вақтнинг ўзида туман ҳокими таклифига кўра 6 нафар тадбиркор ҳам иш бошлади, вилоят ҳокими раислигида ўтказилган тендер ғолиби ҳам ер ва биноларга эгалик ҳуқуқини қўлга киритди. Алал-оқибат можаро бошланди. 2016 йили бўй кўрсата бошлаган муаммо 2019 йилга келиб ечимсиз тугунга айланди.
— Ҳоким бизга ишлаб чиқариш таклифини бергач, 2015 йил 20 март куни вилоят ҳокими, ҳудудий танлов комиссияси раиси З.Рўзиев ҳамда вилоят рақобат бошқармаси бошлиғи, танлов комиссияси раиси ўринбосари I.Жўраевга собиқ болалар шифохонаси ҳудудининг 1,24 гектари ва 2 та биноси тендер танловига киритилмаслигини сўраб, мурожаат қилган, — дейди тадбиркор Умида Мирзаева. — Аммо кўриб турганингиздек, ҳокимнинг ушбу хати инобатга олинмаган.
Тадбиркор Шерзод Ибодуллаев 6 нафар тадбиркорга иш бошлаши учун алоҳида қарор берилмагани, 2015 йил 13 март куни чиққан қарор эса умумий мазмунга эгалиги, натижани кўрсатувчи танлов ўтказилмаганлигини билдирмоқда.
— Туман ҳокимининг 2015 йил 13 мартдаги қарорида жисмоний ва юридик шахсларга танлов асосида ер ажратиб берилиши айтилган бўлса-да, айнан қайси тадбиркорларга берилиши ёзилмаган, қолаверса, танлов асосида берилсин дейиляпти, лекин танлов ҳам ўтказилмаган, — дейди «Чироқчи томорқа» МЧЖ раҳбари Шерзод Ибодуллаев. — Мен эса вилоят ҳокими раислигида бўлиб ўтган тендер танловида бинони жами 2,8 гектар майдони ва 14 та биноси билан «нол» балансда оляпман. Демак, ҳудудга ўз-ўзидан мен ҳақлиман.
Аниқланишича, Хусусийлаштириш, монополиядан чиқариш ва рақобатни ривожлантириш қўмитаси вилоят ҳудудий бошқармаси ҳамда «Чироқчи томорқа» МЧЖ ўртасида 2015 йил 24 июль куни шартнома тузилади. Унга кўра, МЧЖ раҳбари Шерзод Ибодуллаев собиқ болалар шифохонасини қўлга киритган вакил сифатида 1,5 йил ичида 2 миллиард 400 миллион сўм маблағ сарфлаб, қуруқ ва ҳўл меваларни қайта ишлаш, ширинликлар, нон ва нон маҳсулотлари ишлаб чиқаришни йўлга қўйиши, ишлаб чиқарилган ҳамда қишлоқ хўжалиги маҳсулотларини сақловчи омборхона — музлатгич ўрнатиши ва камида 25 та янги иш ўрни яратиши лозим эди. Бироқ айтилган ишлардан фақатгина омборхона — 600 тонналик музлатгич ўрнатилган, холос.
— Бино ва ер майдонини тендерда ютиб олсам-да, иш бошлашимга дастлаб туман ободонлаштириш бошқармаси, сўнг тадбиркорлар халал берди, — дейди Шерзод Ибодуллаев. — Бинодан чиқиб кетишмади. Бу ҳақда қўмитанинг вилоятдаги масъулларига маълум қилгандим. Шундан сўнг уларнинг ёрдами билан 2016 йил апрель ойида туман ободонлаштириш бошқармасини бинодан чиқаришга эришдик. Тадбиркорларга келганда эса иш анча ортга сурилди.
Маълум қилишларича, ишга Рақобатни ривожлантириш қўмитаси аралашгач, туманнинг ўша пайтдаги ҳокими Равшан Комилов тадбиркор Шерзод Ибодуллаевни чақириб, 6 нафар тадбиркорни ҳудудга ўзи киритгани, 1,24 гектар ер, 2 та бинодан ташқари ҳудудда иш қилавериши мумкинлигини айтган ва тадбиркорни шаштидан қайтарган. Оқибатда қўмита вилоят бошқармаси тадбиркор Шерзод Ибодуллаевни судга беради ва айтилган ваъдалар 2016 йил ноябрь ойига қадар ҳам бажарилмаганлиги, боз устига тадбиркор томонидан 1 миллиард 43 миллион сўм инвестиция киритилгани тўғрисида ёлғон маълумот тақдим этилгани рўкач қилади.
Жиноят ишлари бўйича Чироқчи туман судининг 2016 йил 4 ноябрь куни бўлиб ўтган судида тадбиркор Шерзод Ибодуллаев айтилган ваъдаларни бажармагани, сохта ҳужжут тақдим этгани учун айбдор деб топилиб, энг кам ойлик иш ҳақининг 55 баравари миқдоридаги жаримага тортилади. Аммо амнистия сабаб жазодан қутилиб қолади.
— Равшан Комилов Миришкор туманига ҳоким бўлиб ўтгач, «Чироқчи томорқа» яна ҳаракатга тушди, — дейди Умида Мирзаева. — Бизни судга берди. 2018 йил август ойида ишлаб турган жойимиздан мажбурий тартибда чиқаришди.
Умида Мирзаеванинг маълум қилишича, ҳоким таклифига биноан иш бошлагач эски ва қаровсиз биноларни 12 миллион сўмга таъмирлатган. 50-60 миллион сўмлик ишлаб чиқариш техникаларини олиб келиб, 17 та янги иш ўрни яратган. 2018 йил август ойида суд томонидан мажбурий тартибда чиқариш лозимлиги ҳақидаги қарор сабаб бугун ўша қилинган ишларнинг бари йўққа чиқмоқда.
Чироқчи туман иқтисодий судининг 2018 йил 15 январь кунидаги ҳал қилув қарорида Умида Мирзаева раҳбарлигидаги «Чироқчи ширинликлари» МЧЖ собиқ шифохонадан мажбурий тартибда чиқарилиши лозимлиги билдирилади. 2018 йил август ойида эса тадбиркор бинодан туман МИБ томонидан мажбуран чиқариб юборилади.
— Шунча қилинган меҳнат барбод бўлди, — дейди Умида Мирзаева. – Ҳудудни ободонлаштириб, янги иш ўринлари яратгандим. Ишлаб чиқаришимни энди ривожлантираётгандим. Шуми тадбиркорни қўллаб-қувватлаш?
Шерзод Ибодуллаев бинонинг бўшатилиши 2019 йил апрель ойига қадар давом этганини айтмоқда. Шунингдек, Умида Мирзаева бинодан чиқиб кетиш учун ундан зарарни қоплаб беришни талаб қилган.
— Нон ишлаб чиқариш мақсадида қурилган тандир учун«Чироқчи ширинликлари» МЧЖ га 11 миллион 550 минг сўм тўлаб берганмиз, — дейди Шерзод Ибодуллаев. — Қолган ўзига керакли техника ва анжомларини олиб чиқиб кетишган.
Маълум бўлишича, ҳудудда Умида Мирзаева раҳбарлигидаги «Чироқчи ширинликлари» МЧЖ билан биргаликда «Бизнес чаппарик» ҳамда «Холдоров Шавкат Абраевич» хусусий корхоналари ишлаб чиқаришни йўлга қўйган. Қолган 3 нафар тадбиркор эса ҳали иш бошламаган. Актам Султонов раҳбарлигидаги «Шарофиддин инвест» хусусий корхонаси ҳам ўша пайтда туман ҳокими таклифига кўра иш бошлашни ният қилган. Тадбиркорга оғзаки тарзда ер ва 2 та қаровсиз бино берилган. Актам Султонов ўша биноларда колбаса ҳамда нон цехи қуришни ният қилган-у, аммо можаро сабаб ҳали иш бошламаган.
Ем ишлаб чиқарувчи «Юсупов Ўктам Худойбердиевич» оилавий корхонаси эса ўша пайтда туман ҳокими томонидан чиқарилган 45 сотих ерга эгалик қилиш ҳақидаги қарори бўлгани боис судда ютиб чиққан ва бугунги кунда ўз ишини давом эттирмоқда.
Тадбиркорлар томонидан «Дарё» мухбирига тақдим этилган суратлардан маълум бўлишича, тадбиркорлардан «Холдоров Шавкат Абраевич» фирмаси қолипли нонлар ишлаб чиқарувчи печ ўрнатган. Макарон цехлар келтирган. Қолган тадбиркорлар қандай шарт-шароит яратгани эса номаълум.
«Чироқчи томорқа» МЧЖ масъуллари тадбиркорлар яна муаммо орттириб, уларни ишдан чалғитмаса ваъда қилинган ишлар тез фурсатда бажарилишини айтишмоқда.
— Ушбу ҳудудга киритилиши лозим бўлган маблағларимиз тайёр, имкониятларимиз бор. Фақат бизни ишдан чалғитиб, судма-суд юришга мажбур қилишмаса, тез орада ваъда қилинган ишлар бажарилиб, 25 та янги иш ўрни яратилади, — дейди «Чироқчи томорқа» мутасаддилари. – 600 тонналик музлатгичимиз тайёр. Қолган ишлар ҳам, албатта, бажарилади.
Кўрганларимиздан англашилишича, ҳар икки томондаги тадбиркорлар ҳам ҳокимлик ва мутасадди ташкилотларнинг хатоликлари қурбони бўлмоқда. Ўз вақтида туманда саноат зонаси ташкил этиш учун тадбиркорларни жалб қилган туман ҳокими ҳам, туманда фойдаланилмаётган бўш бинолардан унумли фойдаланишни мақсад қилган вилоят ҳокими раислигидаги ҳудудий танлов комиссияси аъзолари ҳам қайсидир маънода ҳақ, албатта. Аммо англашилмовчиликлар касри тадбиркорларга ураётгани ачинарли. Хўп, бўлар иш бўлди. Аммо 4 йилдан бери туман ва вилоят ҳокимликлари нега масалага жиддий қарамаяпти? Ёки бунинг учун ҳам Тошкентдан кимдир келиши ва муаммони ҳал қилиб бериши керакми?
Изоҳ (0)