Ўзбекистон бош вазири Абдулла Арипов 22 октябрь куни Москвадаги «Очиқ инновациялар—2019» форумида иштирок этиб, Ўзбекистон ва бошқа ривожланаётган давлатлар олдида турган рақамли ривожланиш кун тартибидаги асосий муаммолар ҳақида сўз юритди, деб хабар бермоқда «Gazeta.uz». Ушбу форумда Россия бош вазири Дмитрий Медведев, Беларусь бош вазири Сергей Румас ҳам қатнашган.
Абдулла Ариповнинг таъкидлашича, рақамли инфраструктура билан таъминланганлик рақамли иқтисодиёт барқарор ривожланишининг асосий шартларидан биридир. Халқаро электр алоқа иттифоқининг маълумотларига кўра, Ер юзи аҳолисининг 40 фоиздан ортиғи интернетдан фойдаланиш имкониятига эга эмас.
«Биз ҳам мамлакат аҳолисининг ярми истиқомат қиладиган қишлоқ жойларни рақамли имконият билан таъминлаш муаммосига дуч келганмиз», — деган у.
Бош вазирнинг айтишича, 2020 йилнинг охиригача, мамлакатдаги барча ижтимоий объектлар, шу жумладан, мактаблар, мактабгача таълим ташкилотлари ва тиббиёт муассасалари — жами 20 мингдан ортиқ объектлар оптик толали алоқага асосланган кенг полосали интернет билан қамраб олинади. Мобил тармоқлар абонентлари сонини 20—23 миллион нафарга етказиш режалаштирилган.
«Жорий йилда Ўзбекистон 5G мобил тармоғи муваффақиятли синовдан ўтказди ва биз келаси йилда Тошкентда ушбу тармоқни тижорий ишга туширишни мақсад қилдик», — дея қўшимча қилган Абдулла Арипов.
Шунингдек, ҳукумат раҳбари Ўзбекистон БАА билан ҳамкорликда 1 миллион нафар дастурчи тайёрлаш бўйича қўшма дастурни амалга оширишни бошлаётгани, бу исталган шахслар учун Ягона масофавий таълим портали орқали АҚШнинг етакчи компанияларининг ўқув дастурлари асосида рақамли кўникмаларни эгаллаш имкониятини яратишини айтди.
Изоҳ (0)