Чили президенти Себастьян Пиньера мамлакатда юз бераётган тартибсизликларни уруш билан қиёслади. Бу ҳақда «ТАСС» хабар бермоқда.
«Биз уруш шароитидамиз. Қудратли ва шафқатсиз, зўравонликка тайёр, ҳатто инсон ҳаёти ҳам аҳамиятли бўлмаган душманга эгамиз. Жиноятчи гуруҳларга хос ташкилотчиликни, ҳар бир хатти-ҳаракат мувофиқлаштирилаётганини кўрмоқдамиз. Барча сиёсий кучларни зўравонлик ҳолатларини қоралашга чақираман», — деди Пиньера телевидение орқали мурожаати давомида.
Чили пойтахти Сантьягода тартибсизлик ва полиция билан тўқнашувларга айланиб кетган норозилик намойишлари 14 октябрь куни, метрода қатнов нархи ўртача 30 песога (0,04 доллар) кўтарилганидан сўнг бошланди. Кейинчалик тартибсизликлар мамлакатнинг бошқа шаҳарларига ҳам тарқалди. Ўт қўйишлар ва талон-торожлар оқибатида камида 7 киши ҳалок бўлди.
Юзага келган вазият туфайли пойтахт ва қатор шаҳарларда фавқулодда ҳолат эълон қилинди. Себастьян Пиньера жамоат транспортида йўлкира нархлари оширилишини бекор қилди.
Изоҳ (0)