UFC’нинг енгил вазндаги чемпиони Ҳабиб Нурмагомедов 17 октябрь, пайшанба куни Дастин Порьега қарши жангдан сўнг биринчи бор россиялик журналистлар билан учрашиши керак эди. Бироқ спортчи маросим бошланиши арафасида кетиб қолди, дея хабар қилмоқда «Спорт Экспресс».
Матбуот анжумани бошловчиси Ҳабибни Кремлга чақириб қолинганини таъкидлаган. Аммо Ҳабибнинг отаси Абдулманап Нурмагомедов ўғлининг Кремлга чақирилганидан бехабар эканини айтган: «Менимча, бир неча кундан сўнг Ҳабиб суҳбатда иштирок этади, яна билмадим. У матбуот анжуманидан нима сабабдан кетиб қолди? Рости, мен билмайман!».
Орадан ярим соатча ўтиб Ҳабиб билан бирга «жуфтакни ростлаган» Фаррух Instagram тармоғига дўстининг машғулот ўтаётгани акс этган видеони эълон қилди.
«Спорт-Экспресс» версиясига кўра, Ҳабиб ва тадбир ҳомийси ўртасида келишмовчилик юзага келган. Хусусан, Нурмагомедов Gorilla энергетик ичимликлари раҳбари Игор Ким билан ёнма-ён ўтиришни истамаган. Маълумот учун, Ким ўз навбатида спиртли ичимликлар тайёрлайдиган компания директорлар кенгаши аъзоси ҳисобланади.
Ким бу масалага ўша заҳоти жавоб қайтарди: «Бизда ҳаммаси жойида, барчаси ажойиб. Ҳабиб нима сабабдан кетиб қолганини билмайман. Бу саволни унинг ўзига беринг».
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)