UFC’ning yengil vazndagi chempioni Habib Nurmagomedov 17-oktabr, payshanba kuni Dastin Poryega qarshi jangdan so‘ng birinchi bor rossiyalik jurnalistlar bilan uchrashishi kerak edi. Biroq sportchi marosim boshlanishi arafasida ketib qoldi, deya xabar qilmoqda “Sport Ekspress”.
Matbuot anjumani boshlovchisi Habibni Kremlga chaqirib qolinganini ta’kidlagan. Ammo Habibning otasi Abdulmanap Nurmagomedov o‘g‘lining Kremlga chaqirilganidan bexabar ekanini aytgan: “Menimcha, bir necha kundan so‘ng Habib suhbatda ishtirok etadi, yana bilmadim. U matbuot anjumanidan nima sababdan ketib qoldi? Rosti, men bilmayman!”.
Oradan yarim soatcha o‘tib Habib bilan birga “juftakni rostlagan” Farrux Instagram tarmog‘iga do‘stining mashg‘ulot o‘tayotgani aks etgan videoni e’lon qildi.
“Sport-Ekspress” versiyasiga ko‘ra, Habib va tadbir homiysi o‘rtasida kelishmovchilik yuzaga kelgan. Xususan, Nurmagomedov Gorilla energetik ichimliklari rahbari Igor Kim bilan yonma-yon o‘tirishni istamagan. Ma’lumot uchun, Kim o‘z navbatida spirtli ichimliklar tayyorlaydigan kompaniya direktorlar kengashi a’zosi hisoblanadi.
Kim bu masalaga o‘sha zahoti javob qaytardi: “Bizda hammasi joyida, barchasi ajoyib. Habib nima sababdan ketib qolganini bilmayman. Bu savolni uning o‘ziga bering”.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)