Расмий Дамашқ Сурия шимоли-шарқидаги Туркиянинг ҳарбий ҳаракатларига жавоб тариқасида у ерга ўз қўшинини юборди. Бу ҳақда мамлакатдаги ОАВ, хусусан Sana ахборот агентлиги хабар тарқатган.
«Сурия ҳарбий гуруҳлари мамлакат шимолига йўл олади ва у ерда ҳудуддаги турк ҳарбийларининг тажовузкорлигига қарши курашади», − дейилган хабарларда.
Расмий Дамашқнинг ушбу ҳаракатларни қай тарзда амалга ошириши ҳақида маълумот берилмаган. Башар Асад ҳукумати бу қарорни турклар билан урушаётган курд гуруҳлари билан келишувдан кейин чиқарган.
Агентликнинг хабар беришича, Сурия ҳукумат қўшинлари Айн-Иса шаҳрига кириб борган, ҳарбийлар Ракка вилоятидаги бир нечта қишлоқда назорат ўрнатган. Шунингдек, расмий Дамашқ ҳарбийлари Фрот дарёсидаги ГЭС яқинида жойлашган аэродромни ҳам эгаллаган.
Маълумотларга кўра маҳаллий аҳоли Сурия қўшинига шаҳарга кираверишда кутиб олган.
Аввал Суриянинг ҳукуматга қарашли ҳарбийларининг курдлар жойлашган ҳудудларда Туркия агрессиясига қарши туриш мақсадида жойлаштирилаётгани хабар қилинганди.
9 октябрда Туркия Сурия шимоли-шарқида Сурия ҳимоя кучлари курдлар жангариларига қарши «Тинчлик булоғи» операциясини бошлаган.
Натижада жаҳон ҳамжамияти Анқаранинг ушбу ҳаракатларини қоралаган. Туркиянинг ушбу ҳарбий операциядан кўзлаган мақсади курдларни мамлакатдан сиқиб чиқариб, Сурия чегарасидаги 30 километр кенгликка эга ҳудудда қочоқлар кўчирилиши учун «хавфсиз зона» тузиш.
Мавзуга доир:
Изоҳ (0)