Тожикистон президенти Эмомали Раҳмоннинг кичик ўғли Сомон Эмомали мамлакатнинг «Талко Кабель» алюминий компанияси бош директорининг ўринбосари лавозимига тайинланди. Бу Тожикистон миллий университетини тамомлаган 21 ёшли Сомон Эмомалининг талабаликдан кейинги энг биринчи иш жойи бўлади. Бу ҳақда «Ахбор» агентлиги хабар тарқатган.
Нашрнинг қайд этишича, Тожикистон президентининг кенжа ўғли уч ойдан буён ушбу лавозимда фаолият юритмоқда.
«Аслида у амалиёт ўташи ва тажриба тўплаши учун бу ерга юборилган. Айни вақтда Душанбе шаҳри мери бўлган президентнинг тўнғич ўғли Рустам Эмомали ҳам меҳнат фаолиятини ёшлар масалалари бўйича қўмитада, Иқтисодий ривожланиш ва савдо вазирлигида бошлаган, кейинчалик божхона хизмати ҳамда коррупцияга қарши кураш агентлигида раҳбарлик лавозимларини эгаллаганди», — дея қайд этган ўз исмини ошкор этмаган Тожикистон фуқароси нашр эълон қилган интервьюда.
Сомон Эмомалининг иқтисодий ривожланиш ва савдо вазирлигида ҳам амалиёт ўтаётгани ҳақида хабарлар тарқалган, аммо ушбу маълумот расман ўз тасдиғини топмаган.
2017 йил 8 мартда Тожикистон президентининг матбуот хизмати Сомон Эмомали ҳам отаси Эмомали Раҳмон ва акаси Рустам Эмомали билан Душанбе шаҳридаги кўчат экиш тадбирида иштирок этганини маълум қилган ва тадбирдаги суратларни эълон қилганди.
Эмомали Раҳмон тўққиз фарзанднинг отаси, унинг еттита қизи, иккита ўғли бор. Тожикистон президентининг болалари мамлакатда юқори лавозимларда ишлайди. Иккинчи қизи Озода Раҳмон президент девонини бошқаради, катта ўғли Рустам Эмомали Душанбе шаҳрининг мери. Тўртинчи қизи Руҳшона Раҳмонова Ташқи ишлар вазирлигида бўлим бошлиғи, олтинчи қизи Зарина Раҳмон Тожикистоннинг энг йирик банкларидан бўлган «Ориёнбанк» раисининг ўринбосари лавозимида фаолият олиб боради.
Изоҳ (0)