Бугун,

  • USD 11014.01
  • RUB 191.8
  • EUR 10674.78

Президент Шавкат Мирзиёев Ашхободда 11 октябрь куни бўлиб ўтган Мустақил Давлатлар Ҳамдўстлиги саммитида Ўзбекистоннинг 2020 йилда МДҲга раислиги давомида ташкилот доирасидаги кўп томонлама ҳамкорликни кенгайтириш ва самарадорлигини оширишга устувор эътибор қаратилишини таъкидлади. Бу ҳақда Президент матбуот хизмати хабар бермоқда. 2019 йилда МДҲга Туркманистон раислик қилди.

Фото: Президент матбуот хизмати

Фото: Президент матбуот хизмати

Ҳамдўстликни янада ривожлантириш концепцияси ва 2030 йилга қадар даврда иқтисодий ривожлантириш стратегиясини қабул қилишни жадаллаштириш таклиф этилган. Президент Мирзиёев 10 йилга мўлжалланган Транспорт ва транзит йўлакларини ривожлантиришнинг устувор йўналишларини ва Ҳудудлараро ҳамкорлик концепциясини ишлаб чиқиш муҳимлигини таъкидлаган.

Савдо-иқтисодий алоқаларни ривожлантириш, эркин савдо зонаси тўлиқ ишлашини таъминлаш, ишлаб чиқариш кооперациясини чуқурлаштириш ва учинчи мамлакатлар бозорини ўзлаштириш, аграр соҳа, энергетика ва телекоммуникациялар тармоғидаги ҳамкорликни кенгайтириш, илмий, инновацион ва таълим дастурларини амалга оширишга алоҳида эътибор қаратилиши таъкидланган.

Келгуси йили Ўзбекистонда биринчи МДҲ ҳудудлараро форуми бўлиб ўтади, шунингдек, МДҲ савдо-саноат палаталари раҳбарлари кенгаши мажлисини ўтказиш, унинг доирасида Ҳамдўстликнинг ишбилармонлик ташаббуслари ҳафталигини ташкил қилиш таклифи билдирилган. Шунингдек, ахборот хавфсизлиги, маданий-гуманитар ҳамкорлик бўйича ҳам қатор тадбирлар режалаштирилган.

Фото: Президент матбуот хизмати

Фото: Президент матбуот хизмати

Музокаралар якунида 2020 йилда МДҲга раислик Ўзбекистонга ўтиши тўғрисида қарор, Стратегик иқтисодий ҳамкорлик тўғрисида декларация, Иккинчи Жаҳон урушидаги ғалабанинг 75 йиллиги муносабати билан МДҲга аъзо давлатлар раҳбарларининг Ҳамдўстлик мамлакатлари халқлари ва халқаро ҳамжамиятга мурожаати, 2020—2022 йилларда терроризм ва экстремизмнинг бошқа зўравонлик кўринишларига қарши курашиш бўйича ҳамкорлик дастури ва бошқа ҳужжатлар қабул қилинди.

Саммит доирасида Ўзбекистон Президенти Туркманистон, Молдова, Тожикистон президентлари ва Арманистон бош вазири билан икки томонлама учрашувлар ўтказгани ҳақида аввал хабар берилган эди. Шавкат Мирзиёев шу куни Тошкентга қайтиб келди.

Изоҳ
Асосий янгиликлар