2020 йилнинг 1 январидан бошлаб Ўзбекистонда давлат хизматчилари айрим тоифаларининг мол-мулкини, даромадлари ва харажатларини декларациялаш тизимини босқичма-босқич жорий этиш режалаштирилмоқда. Президент қарори лойиҳаси бандлик ва меҳнат муносабатлари вазирлиги томонидан жамоатчилик муҳокамасига қўйилди, деб ёзади «Gazeta.uz».
Ҳужжатда қайд этилганидек, у «давлат хизматчилари ўртасида коррупцияга қарши курашиш чора-тадбирлари самарадорлигини ошириш, давлат ва хўжалик бошқаруви органлари, шунингдек, маҳаллий ижро этувчи ҳокимият органлари мансабдор шахслари фаолиятида шаффофликни таъминлашга қаратилган».
Йиллик декларация давлат хизматчиларининг ота-оналари, турмуш ўртоғи ва фарзандлари, шу жумладан, фарзандликка олинган оила аъзоларини қамраб олади.
Рўйхати Президент томонидан белгиланадиган мансабдор шахсларнинг айрим тоифалари учун декларацияга киритилган оила аъзоларининг кенгайтирилган доираси белгиланиши мумкин.
Декларация давлат хизматчисининг электрон рақамли имзоси билан тасдиқланган электрон шаклда топширилиши режалаштирилмоқда. Декларацияда кўрсатилган маълумотлар махфий ҳисобланади ва ҳимоя қилинади.
Декларациядаги давлат хизматчиларининг мол-мулки ва даромадлари тўғрисидаги алоҳида маълумотлар умумлаштирилган шаклда оммавий равишда эълон қилиниши мумкин.
Давлат сирларига тааллуқли бўлган ташкилотларнинг мансабдор шахслари давлат сири тўғрисидаги қонун ҳужжатлари қоидаларини ҳисобга олган ҳолда даромад ва мол-мулк тўғрисидаги ахборотларни маълумотнома шаклида тақдим этади.
Давлат хизматчилари ва уларнинг оила аъзолари даромадлари, мол-мулки ва харажатлари тўғрисидаги маълумотларни ўз ичига олган маълумотлар базаси оператори функцияси давлат солиқ қўмитасига тақдим этиш таклиф этилади.
Бош прокуратура ҳузуридаги иқтисодий жиноятларга қарши курашиш департаментига декларацияларда ахборотнинг ишончлилиги ва тўлиқлигини танлаб назорат қилиш ҳуқуқини бериш режалаштирилган.
Декларацияни давлат хизматчиларининг тегишли лавозимлари бўйича ишга қабул қилишда номзодлар ҳам тақдим этишлари керак.
Даромад, мол-мулк ва харажатлар тўғрисидаги декларацияни тақдим этмаслик, ёхуд улар томонидан мол-мулк, даромад ва харажатлар тўғрисида тўлиқ ёки ишончсиз маълумотларни тақдим этиш, агар бундай маълумотларни тақдим этиш мажбурий бўлса, меҳнат шартномасини бекор қилиш ёки ишга қабул қилишни рад этиш учун асос бўлиб хизмат қилади.
1 декабрга қадар давлат хизматчиларининг мол-мулки, даромадлари ва харажатлари рўйхатини тасдиқлаш режалаштирилган ва 1 январга қадар давлат хизматчиларининг мол-мулкини, даромадларини ва харажатларини декларациялашнинг ягона ахборот тизимини жорий этиш режалаштирилган.
2020 йилдан даромад ва мол-мулкини кимлар декларациялаши керак:
- Олий Мажлис Қонунчилик палатаси спикери ва Сенати раиси ва уларнинг ўринбосарлари;
- Бош вазир ўринбосарлари, бош вазир ўринбосарлари маслаҳатчилари;
- Ҳисоб палатаси, Марказий сайлов комиссияси, Марказий банк раислари ҳамда уларнинг ўринбосарлари;
- Вазирлар (давлат қўмиталари раислари, республика давлат бошқарув органларининг биринчи раҳбарлари) ва уларнинг ўринбосарлари;
- Давлат бошқаруви органларининг ҳудудий бошқармалари бошлиқлари ва уларнинг ўринбосарлари;
- Қорақалпоғистон Республикаси Вазирлар Кенгаши раиси, вилоятлар, туманлар ва шаҳарлар ҳокимлари ҳамда уларнинг ўринбосарлари;
- Президент маъмурияти, Қонунчилик палатаси ва Сенат девони, Вазирлар Маҳкамаси ижро этувчи аппаратининг айрим мансабдор шахслари;
- Прокуратура органлари ходимлари, давлат хавфсизлик хизмати ходимлари, миллий гвардия, ички ишлар органлари ходимлари;
- Устав фондида давлат улуши 50 фоиздан ортиқ бўлган давлат корхоналари ва акциядорлик компаниялари (жамиятлари) раҳбарлари, шунингдек, уларнинг ўринбосарлари.
- Вазирлик ва идораларнинг таркибий бўлинмалари бошлиқлари, шунингдек уларнинг ўринбосарлари;
- Қонунчилик палатаси ва Сенат аппаратларининг таркибий бўлинмалари раҳбарлари;
- Вилоят, туман ва шаҳар ҳокимлари аппаратларининг таркибий бўлинмалари раҳбарлари;
- Устав фондида давлат улуши 50 фоиздан ортиқ бўлган давлат корхоналари ва акциядорлик компаниялари (жамиятлари) таркибий бўлинмалари раҳбарлари, шунингдек, уларнинг ўринбосарлари.
- Ишлаб чиқариш, техник ва хизмат кўрсатувчи ходимлардан ташқари давлат бошқаруви органлари ва маҳаллий ижро ҳокимияти органларининг бошқа ходимлари;
- Устав фондида давлат улуши 50 фоиздан ортиқ бўлган давлат корхоналари ва акциядорлик компаниялари (жамиятлари) Марказий бошқарув органларининг бошқарув ходимлари;
- Бюджет ташкилотлари раҳбарлари ва уларнинг ўринбосарлари.
Изоҳ (0)