Қашқадарё вилоятининг Китоб тумани, Панжи қишлоғида яшовчи аҳоли вакилларининг «Дарё»га шикоят қилишича, улар истиқомат қиладиган ҳудудда 9 та мактаб бор. Аммо бирорта ҳам боғча йўқ. Боғча ташкил этиш бўйича Президентга қилинган мурожаатга масъуллар етарли даражада эътибор қаратмаяпти.
Аҳоли шикоятини ўрганиш мақсадида Китоб туманининг Панжи қишлоғида бўлган «Дарё» мухбири Отабек Қўлдошевнинг ёзишича, 23 минг аҳоли истиқомат қилувчи ҳудудда бор-йўғи 25 нафар бола қамровига мўлжалланган оилавий боғча бор, холос. Ота-оналарнинг аксарияти фарзанди боғча тарбиясини кўрмагандан шикоят қилмоқда.
— Президентимизга мурожаат қилиб, ҳудудда касб-ҳунар коллежидан бўшаган бинода боғча ташкил этиш таклифини бергандик, — дейди қишлоқ оқсоқолларидан бири Маҳмуд Эргашев. — Аммо туман масъуллари аҳоли фикри билан қизиқмасдан коллеждан бўшаган бинода мактаб ташкил этиш таклифини берибди.
Ҳақиқатдан ҳам касб-ҳунар коллежидан бўшаган бино пештоқига «91-мактаб» деб ёзиб қўйилган.
— Аммо мактабда бирорта ҳам ўқувчи йўқ, — дейди аҳоли вакиллари. — Боиси мактабга эҳтиёж йўқ. Шундай экан, бино шунчаки ҳувиллаб ётганидан кўра, боғча ташкил қилсак, мақсадга мувофиқ бўлмасмиди?
Мактаб эканлиги айтилган бинога кирар эканмиз, бирорта ҳам ўқувчи йўқлигига гувоҳ бўлдик.
Маълум қилинишича, 2019 йил 23 сентябрь куни 93 нафар аҳоли имзоси қўйилган мурожаатнома Президентга юборилади. Унда 91-мактаб сифатида ташкил этилган бино бугунги кунда ўқувчига эга эмаслиги, шу боисдан мазкур бўш бинода боғча ташкил этишда амалий кўмак беришини сўрайди.
— Президентга йўллаган мурожаатимизга жавобан Китоб туман мактабгача таълим бўлими раҳбаридан жавоб келди ва ушбу бино Халқ таълими вазирлиги балансига берилганини айтиб, Мактабгача таълим вазирлиги балансига олинса, боғча ташкил этишлари мумкинлиги ёзилган, — дейди аҳоли вакиллари. — Биз бино халқ таълими вазирлиги балансидалигини биламиз-ку? Шунинг учун ҳам давлат раҳбарига мурожаат қилдик. Мактабгача таълим вазирлиги балансига ўтказишни, боғча ташкил этишни сўрадик.
Мурожаат муаллифлари боғча ташкил этишга масъул мутасаддилар аҳоли мурожаатини ўқиб кўрмаган деган тахминда.
— Мактабгача таълим тизимига масъул бўлган амалдорлар мурожаатимизни ҳатто ўқиб ҳам кўрмаган кўринади, — дейди Маҳмуд Эргашев. — Боиси мурожаатимизда бинони бир вазирлик ҳисобидан иккинчи вазирлик ҳисобига ўтказишда кўмак сўраганмиз.
Аҳоли ҳисоб-китобига кўра, бугунги кунда қишлоқдан туман марказидаги боғчага фарзандларини олиб бориб келиш харажати 12 миллион сўмни ташкил этади.
— Бир йилда 12 миллион сўм харажат қилар эканмиз, бир болани туман марказидаги боғчага олиб бориб келиш учун, — дейди аҳоли вакиллари «Дарё» мухбири билан суҳбати давомида. — Ўша пулнинг йўлга сарфлагандан кўра, янги ташкил этиладиган боғча жиҳозларига сарфласак мақсадга мувофиқ бўлармиди? Коллеждан бўшаган бинони ҳудуд тадбиркорларидан бирига беришса, давлат-хусусий шерикчилиги асосидаги болалар боғчаси ташкил топарди.
Аҳолининг шикоят қилишича, ҳудудда болалар боғчасига эҳтиёж жуда юқори.
— 6 нафар набирамнинг 5 нафари боғча ёшида, — дейди Эргаш Туропов. – Аммо боғча таълимини олмай ўсяпти улар.
Аниқланишича, ҳудудда 25 нафар болага мўлжалланган оилавий боғча бор.
— «Қалдирғоч» деб номланган оилавий боғчамиз 25 нафар болага мўлжалланган, аммо ҳудудда боғчага эҳтиёж юқорилигидан 50 нафар болани қамраб олдик, — дейди боғча мудираси Шоира Нарзиева. — Менга имкон беришса, коллеждан бўшаган бинода давлат-хусусий шерикчилиги асосида боғча ташкил қилардим. Бунга имкониятим етади.
Китоб туман ҳокимлиги ахборот хизмати раҳбари Яшин Тўраевнинг маълумот беришича, ҳозирда 91-мактаб сифатида ташкил этилган бино 540 ўринли бўлиб, Президентнинг 2019 йил 6 сентябрдаги фармонига мувофиқ халқ таълими тизими ихтиёрига берилган.
— Бинода мактаб ташкил этилганига эътирозимиз йўқ, бу Президент фармони экан. Аммо бу мактабга эҳтиёж йўқ-ку, шунчаки ҳувиллаб ётгандан кўра, аҳоли эҳтиёжига ярасин деймиз-да, — дейди Эргаш Туропов. — Ҳудуд раҳбарларининг аҳоли эҳтиёжини ўрганмасдан мактаб керак деган хулосани беришгани мақсадга мувофиқ эмас.
Аҳолининг айтишича, мазкур бинода мактаб ташкил этилса-да, болаларнинг мактабга келиб-кетиши жуда мушкул. Боиси бино ёнида катта автомобиль йўли ўтган. Пиёдалар йўлаги йўқ.
— Фарзандларимизнинг катта йўлдан юриб мактабга келиб-кетишига ижозат беролмаймиз. Сабаби мактаб ёнидаги йўл асосий автомобиль йўли бўлиб, машиналар серқатнов, автомобиллар жуда тез ҳаракатланади, — дейди аҳоли вакиллари. — Мактаб боласи учун бу жуда хавфли йўл.
Фуқаро Тошпўлат Ҳаққуловнинг айтишича, жорий йил айнан шу ҳудудда 3 та ЙТҲ содир этилган.
Туман халқ таълими бўлими масъули Анвар Умаровнинг маълумот беришича, ҳудудда ўқувчиси йўқ 91-мактабни очиш таклифи туман халқ таълими бўлими ташаббуси ҳисобланади. Туман ҳокими мактаб ўқувчилари учун хавфсиз ҳудуддан йўл қилиб беришини айтган. Аммо ҳали қилиб берилмаган.
Туман халқ таълими бўлими мутасаддисининг фикрича, янги ташкил этилган мактаб келажакда ушбу ҳудуд аҳолисининг мактабга бўлган эҳтиёжини қондиради. Бу даргоҳ 300 нафарга яқин ўқувчига эга бўлиши кутилмоқда.
Хўш, ҳудуд аҳолисининг болалар боғчасига бўлган эҳтиёжи қандай қондирилади? Ахир 23 минг аҳоли фарзандлари учун боғча керак-ку?
Ушбу саволга жавоб олиш илинжида туман ҳокимнинг ижтимоий масалалар бўйича ўринбосари билан суҳбатлашишни мақсад қилдик. Аммо ўринбосар телефон қўнғироқларимизга жавоб бермади. Ҳокимнинг биринчи ўринбосари Асқар Сирожов орқали кейин алоқага чиқишларини сўраб қилган илтимосимиз ҳам жавобсиз қолди. ОАВ вакилига муносабат шу бўлса, фуқароларнинг мурожаати жавобсиз қолаётганига ажабланмаса ҳам бўладиган кўринади...
Изоҳ (0)