Ўзбекистонлик Нодира Қодирова турк депутати уйида 23 сентябрь куни ўз жонига қасд қилган эди. Ўша кундан бери тайинли бирор гап айтмай келаётган депутат ниҳоят Туркия Олий Мажлисида Нодира Қодирова ҳақида гапирди, деб ёзади «Togri.uz».
У депутат сифатида терговлардан иммунитети борлигига шама қилган ва эшик очаман деб елкаси оғриб қолганини гапирган. Нодира қодированинг ўлимини эса «кўнгилсизлик» деб атаган.
Туркия АК партияси депутати Ширин Унал 23 сентябрь куни унинг уйида ўзини ўлдирган Нодира Қодирова иши юзасидан Туркия Олий Мажлисида гапирган:
«Афсуски, икки ҳафта бурун уйимизда бир кўнгилсизлик содир бўлди. Сўзим бошида марҳумага Аллоҳдан раҳмат тилайман. Бу бечора қиз январь ойида келди, 20 йилдан буён тўшакка михланиб қолган хотинимга қараётган икки хизматкордан бири эди. Кейинги 2—3 ойда унда руҳий бузилиш бўлаётганини билиб, иккинчи бир ёрдамчини олдик.
Нодира уни кетказмоқчийди, ўзини кетказди, Аллоҳ раҳмат қилсин. 5 дақиқада полиция, тез ёрдам келди. Улар келгунга қадар кичик қизим билан у қамалиб олиб ўзини ўлдирган хона эшигини очишга уриндик. Елкам ҳали ҳам оғрияпти, аммо барибир очолмадик. 3—4 полиция ходими эшикни очишди. Тезда касалхонага етказдилар. Ярим соатларда Анқара полицияси мудири ёнимизда эди. Сўнг навбатчи прокурор келди. Мен ҳар иккисига қўлимдан келганча ёрдам беришимни айтдим. Оиламизнинг ҳар бир аъзоси бемор хотинимдан тортиб, иккинчи хизматчимизгача, ярим кечагача саволларга жавоб бердик. Прокурорга 15 дақиқа давомида бор гапни айтдим. Сўнг прокурор касалхонага бориб, у ерда ҳам суриштирув қилди. Ўша куни депутатлик иммунитетимни ҳам бир ёнга суриб, бармоқ изигача топширдим. Аллоҳ ҳеч кимнинг бошига бунақа кўнгилсизликни солмасин».
Ширин Унал ўзининг ҳар қандай таъқиб, терговдан муҳофаза қилинганига шама қилганига қўшимча, бу ишлар душманлари томонидан атай бўрттирилаётганини ҳам иддао қилган:
«Табиий, менинг Олий Мажлисда аввал қилган ишларим ёқмаган айрим тоифалар бор. Улар бу фурсатдан фойдаланиб, мени ва оиламни ерга тиқишди, Аллоҳ ҳеч кимнинг бошига буни солмасин. Мен ўзимга юкланган ишни қиламан, нима лозим бўлса ўшани қиламан», деган депутат.
Изоҳ (0)