Қашқадарё вилоятининг Косон туманидан Қарши шаҳрига йўловчи ташувчи Damas ҳайдовчиларининг шикоят қилишича, туман ЙПХ инспекторлари ҳайдовчиларнинг ҳужжатини олиб қўйиб, ҳар куни пахтага бепул ҳашарчи ташишга мажбур қилаётгани айтилмоқда.
Ҳайдовчилар шикоятини ўрганган «Дарё» мухбири Отабек Қўлдошевнинг ёзишича, «Насаф аудио-видео» МЧЖ раҳбарлигидаги уюшмага аъзо бўлган «Қарши—Косон», «Косон—Қарши» йўналишида ҳаракатланувчи 44 та Damasавтомобилларининг техник паспорти Косон туман йўл ҳаракати хавфсизлиги бўлими инспекторлари Акром Авазов ҳамда Шаҳбоз Қўчқоровлар томонидан олиб қўйилган.
«Айни кунда Қаршидан Косонга қатновчи Damas ҳайдовчиларининг 50—60 фоиз ҳайдовчисида автомобилининг техник паспорти йўқ. Боиси, ‘ГАИ’ олиб қўйган. Ва ҳар куни бир маротаба пахтага одам олиб бориш мажбуриятини юклаган», — дейди ҳайдовчи Моҳир Саломов.
«Косон—Қарши», «Қарши—Косон» йўналишидаги ҳайдовчилар фаолиятини назорат қилувчи уюшма «Насаф аудио-видео» МЧЖ иш юритувчиси Мавжуда Уваеванинг тасдиқлашича, ушбу йўналишга аъзо Damas автомобилларининг аксарияти ЙПХ инспекторларининг пахтага бепул одам ташиш талабини бажаришга мажбур.
Мардон Тўхтаев исмли ҳайдовчининг «Дарё» мухбирига айтишича, унга тегишли автомобилнинг техник паспортини пахта мавсуми бошланган пайт инспектор Акром Авазов олиб қўйган ва ҳалигача қайтариб бермаган.
Ҳайдовчи Эркин Бобохонов эса ҳужжати Шаҳбоз Қўчқоров исмли ЙПХ ходими томонидан олиб қўйилганлигини айтиб, ходим томонидан хизматга мажбурланаётганини айтмоқда.
«Дарё» мухбири билан телефон орқали мулоқотга киришган ЙПХ ходими Шаҳбоз Қўчқоров мухбир саволини эшитгач, «йўқ бундай қилмаганман» дея телефонни ўчирди. Ва қайтиб ходимга уланолмадик.
Damas’чиларнинг мажбурий тарзда пахтага одам ташишини рад этган Косон туман Йўл ҳаракати хавфсизлиги бўлими бошлиғи Шуҳрат Холматовнинг айтишича, Damas ҳайдовчиларининг пахтага одам ташиши бор гап. Аммо бунинг учун уларга ҳақ тўланади. Шуҳрат Холматовга кўра, бундай вазият юзага келишига йўналишни тартибга солувчи уюшма масъуллари айбдор.
Мавзуга доир:
Маълум қилинишича, сентябрь ойи бошида пахта тозалаш заводлари, уюшмалар ва фермерлар иштирокида йиғилиш ўтказилган. Йиғилишда Damas ҳайдовчиларининг хизматига шартнома асосида пул тўлаш назарда тутилган ва шартнома имзолаш масъулияти уюшма бошлиқларига юклатилган.
Шуҳрат Холматовнинг маълумот беришича, ўша йиғилишда айни кунда ҳужжатлари олиб қўйилгани айтилаётган Damas’лар уюшмаси масъуллари ҳам иштирок этган.
«Насаф аудио-видео» МЧЖ иш бошқарувчиси Мавжуда Уваева бундай шартномадан хабари йўқлигини айтмоқда.
Косон туман Йўл ҳаракати хавфсизлиги бўлими бошлиғи Шуҳрат Холматов «Дарё» мухбири билан суҳбати сўнгида «Агар ходимларимиз англашилмовчилик сабаб бирор бир ҳайдовчининг ҳужжатини олишган бўлса, албатта бугуноқ қайтариб беради» деди. Бундан келиб чиқадики, айрим ҳайдовчиларининг ҳужжати олиб қўйилгани бор гап.Нима учун ва қайси асосга кўра? «Дарё» масъуллардан изоҳ кутади.
Изоҳ (0)