Ички ишлар вазирлиги Малака ошириш институти профессор-ўқитувчилари «Кексалар ҳафталиги» доирасида Ёши улуғ инсонлар ҳолидан хабар олди. Бу ҳақда «Дарё»га ИИВ Малака ошириш институти ахборот хизмати хабар берди.
Ўзбекистон Республикаси Вазирлар Маҳкамасининг жорий йил 27 сентябрдаги «Кекса авлод вакилларининг жамиятдаги ўрни ва ижтимоий фаоллигини янада ошириш чора-тадбирлари тўғрисида»ги қарорига мувофиқ, БМТ Бош Ассамблеясининг 1990 йил 14 декабрдаги резолюцияси билан эълон қилинган «1 октябрь – Халқаро кексалар куни»ни ҳар йили Ўзбекистонда муносиб нишонлаш мақсадида октябрь ойининг биринчи ҳафтаси «Кексалар ҳафталиги» этиб белгиланди.
Шу муносабат билан ИИВ Малака ошириш институти профессор-ўқитувчилари қариялар холидан хабар олиб, уларнинг шарт–шароитлари билан танишган.
Хусусан, Қорақалпоғистон Республикаси Тахтакўпир тумани «Ойдин кўл» маҳалласида яшовчи 75 ёшли Шайдохон Ўразимбетова, Сурхондарё вилояти Термиз тумани «Кокилдор ота» маҳалласида яшовчи 78 ёшли Қўзимурод ҳожи ота Шобиров, Ангор тумани Улуғбек номли маҳаллада яшовчи 83 ёшли Роҳия момо Хайитова, 1952 йилда туғилган Бозорбой Ўразимбетов Жарқўрғон тумани «Улуғбек» маҳалласида яшовчи 72 ёшли Улахон Сафарова ва бошқалар билан суҳбатлашилган.
«Ижтимоий муаммоларни тинглаган профессор-ўқитувчилар маҳаллий давлат ҳокимияти органлари билан ҳамкорликда уларнинг ечимини топишга эътибор қаратмоқда», — дейилади хабарда.
Қўшимча қилинишича, институт жамоаси ушбу ҳудуд «Саховат» уйларидаги кекса авлод ҳолидан ҳам хабар олган.
Аввалроқ, ИИВ Малака ошириш институти профессор-ўқитувчилари таълим муассасаларида тадбирлар уюштиргани, меҳр-мурувватга муҳтож фуқароларга ғамхўрлик кўрсатгани ҳақда хабар бергандик.
Изоҳ (0)