2015 йили Қарши шаҳар ҳокими қарорига мувофиқ шаҳарнинг «Гулшан» маҳалла, «Китоб» кўчасида жойлашган 15 та хонадон бузилишга тушди. Бу ҳақда ўша пайт шаҳар ҳокимлигининг огоҳлантириш хатида маълум қилинган.
«Снос»га тушган хонадонларнинг 7 таси бузилди ва зарар қопланди. Қолган 8 та хонадон вакиллари эса янги қад ростлаган кўп қаватли уйлар «соя»сида қолиб кетмоқда. Аҳоли эса бундан норози.
— Ҳовлимизнинг ҳар бир бурчаги кўп қаватли уйларда яшовчи аҳолига кўриниб туради, — дейди аҳоли вакилларидан бири Лобар Бобоева. — Шу боисдан ҳам бундай шароитда яшаб бўлмайди. Кўп қаватли уй шундоққина «бурнимиз тагида». Шаҳар ҳокими Жамшид Фозиловнинг 2015 йил 27 июль куни бизга юборган огоҳлантириш хатида биз яшаётган 46-хонадон ҳам бузилишга тушгани ҳақида айтилганди.
Аниқланишича, шаҳар ҳокимининг ушбу огоҳлантириш хатида аҳоли хонадонлари Президентнинг 2013 йил 25 июлдаги «Қарши шаҳрини келажакда қайта қуриш режаси ва замонавий йўл-транспорт коммуникацияларини ривожлантириш давлат дастури тўғрисида»ги қарорига асосан қизил чизиққа тушгани ёзилган.
— Режага кўра, биз яшаётган уйлар ўрни болалар ўйингоҳи бўлиши керак экан, — дейди Лобар Бобоева. — Аммо кўриб турганингиздек, ишлар якунига етмади.
Кузатувларимизга кўра, ҳудудда қад ростлаган кўп қаватли уйлар ёнида ҳақиқатан ҳам болалар ўйингоҳи қурилмаган.
Ушбу кўчада яшовчи Холмамат Алиқуловнинг айтишича, бузилиши мўлжалланган 15 та хонадон саралаб бузилган ва зарар қоплаб берилган.
— Биздан олдинги ва кейинги уйлар бузилган, аммо ўртада биз ва қўшниларимиз яшаётган 3 та хонадон қолиб кетди, — дейди Холмамат Алиқулов. — Уйимиз бузилишга тушади дейишгани боис, иккиланиб қолдик. Хотиржам яшолмаяпмиз, аросатда қолдик.
Аҳоли шикоятига кўра, улар яшаётган уйларнинг шундоққина пешонасида қад ростлаган кўп қаватли уй қурилиши пайтида ҳовли деворларига зарар етган. Ҳожатхоналар қулаб тушган.
— «Дом» қурилаётган пайт ҳовлимиз деворларига катта зарар етказилди, — дейди Лобар Бобоева. — Қурилиш материаллари олиб келиб тўкилиши натижасида деворларимиз қулади. Қулаган деворлар ўрнига девор қурилмасдан, вақтинча ёпиб кетилди. Қолаверса, ёмғирли мавсумда «дом» томидан тушаётган оқова сувлар тўғри келиб бизнинг ҳожатхонага киряпти, шу боис ҳожатхонамиз ҳам қулаб тушди. «Дом»дагиларга томоша бўлиб яшашимиз камдек, энди моддий зарар ҳам кўряпмиз. Бу адолатсизлик эмасми?
Қарши шаҳар ҳокими ўринбосари Улуғбек Авазовнинг маълум қилишича, аҳоли хонадонлари билан ёнма-ён жойлашган ушбу кўп қаватли уйни «Назар бунёдкори» МЧЖ қурувчилари қурган бўлиб, молиявий таъминот «Микрокредитбанк» зиммасида бўлган. Аммо қурилиш ташкилоти банкрот бўлгани боис, ишлар якунига етмаган ва бошқа қурувчи жалб этилган. Улуғбек Авазовга кўра, уй қурилишини якунлаган қурувчи зарар унинг даврида бўлмаганини айтиб, зарарни қоплашдан бош тортиши мумкин.
— Қурилиш пайтида аҳоли деворларига етказилган зарарни қоплаш учун шаҳар ҳокимлиги аҳоли манфаатларини кўзлаб, Турдиали Халилов раҳбарлигидаги «Назар бунёдкори» МЧЖни судга беради, — дейди Улуғбек Авазов. — Суд қарорига мувофиқ зарар қоплаб берилади.
«Дарё» мухбири билан суҳбатлашган аҳоли вакиллари бузилишга тушган хонадонлари қоладиган бўлса, кўп қаватли уй ва хонадонлари ўртасида девор тортилишини истамоқда.
— Хўп, агар кўп қаватли уйлар учун болалар ўйингоҳи шарт бўлмаса ва ўша пайтда назарда тутилган лойиҳа бекор бўлган бўлса, биз ҳеч нарса деёлмаймиз, — дейди Холмамат Алиқулов. – Аммо бизга етказилган зарар қоплансин. Кўп қаватли уй ва ҳовлимиз ўртасида девор қуриб беришсин. Бу девор «дом»дан тушаётган сувларга бардош берадиган ва 10-20 йилга кафолатланган бўлсин.
Шаҳар ҳокими ўринбосари Улуғбек Авазовнинг маълумот беришича, ушбу хонадонлар ўрнида ҳам кўп қаватли уй қурилиши учун аҳоли таклифига биноан қурувчи танланган. Қурувчи таклиф қилаётган нарх хонадон вакилларини қониқтирмаяпти.
— Биз истиқомат қилаётган 46-уйни 220 миллион сўмга нархлашяпти, — дейди Лобар Бобоева. – Аммо бундан икки йил илгари уйимизни 314 миллион сўм баҳолашган. Қандай қилиб мен кам нархга бераман? Эртага ўрнига яна уй сотиб олишим бор. Қурувчининг ўзи қурган кўп қаватли уйлардан бир хонали уйнинг нархини сўраб кўринг, бинойидек ҳовли учун берилаётган пулдан ҳам баланд.
— Бизнинг ҳовлимиз учун 200 миллион таклиф қилишди, — дейди Дилсора Номерова. – Аммо биз нархлатган пайтимиз 220 миллион дейишган. Шунинг учун розилик бермаяпмиз.
Холмамат Алиқулов яшаб келаётган ҳовлисини 490 миллион баҳолашгани, аммо шу пайтга қадар бирор бир қурувчи нарх таклиф қилмаганини билдирмоқда.
Мавзуга доир: Адлия вазири Русланбек Давлетов: «Одамларнинг уйини бузиб, кўчага чиқариб қўйиб, компенсация тўламаслик — ваҳшийлик!»
Қарши шаҳрини замонавий шаҳар қилиш учун ўша пайтда қилинган ишлар таҳсинга лойиқ, албатта. Шаҳар кўркига кўрк қўшиш, тоборо кўпайиб бораётган шаҳар аҳлининг уй-жойга бўлган эҳтиёжини қондириш мақсадида замонавий кўп қаватли уйларнинг қад ростлаши эса нур устига нур.
Бироқ, ҳар бир иш белгиланган режага кўра бажарилса мақсадга мувофиқ бўларди. Аҳоли шикоятини ўрганиш давомида кўплаб саволлар очиқ қолди. «Китоб» кўчасидаги 15 та хонадонга нима учун бузилиши тўғрисидаги огоҳлантириш хати берилди? Ушбу хонадонлар ўрнида ҳақиқатдан ҳам болалар ўйингоҳи бўлиши назарда тутилганмиди? Унда нега лойиҳада кўрсатилган ишлар якунига етмади?
Очиқ қолаётган саволларга масъуллар тез орада жавоб беради деган умиддамиз.
Изоҳ (0)