Buziladi-buzilmaydi: Qarshi shahrining “Gulshan” mahallasida yashovchi aholi 4 yildan beri shu tahlikada yashamoqda

2015-yili Qarshi shahar hokimi qaroriga muvofiq shaharning “Gulshan” mahalla, “Kitob” ko‘chasida joylashgan 15 ta xonadon buzilishga tushdi. Bu haqda o‘sha payt shahar hokimligining ogohlantirish xatida ma’lum qilingan.

“Snos”ga tushgan xonadonlarning 7 tasi buzildi va zarar qoplandi. Qolgan 8 ta xonadon vakillari esa yangi qad rostlagan ko‘p qavatli uylar “soya”sida qolib ketmoqda. Aholi esa bundan norozi.

— Hovlimizning har bir burchagi ko‘p qavatli uylarda yashovchi aholiga ko‘rinib turadi, — deydi aholi vakillaridan biri Lobar Boboyeva. — Shu boisdan ham bunday sharoitda yashab bo‘lmaydi. Ko‘p qavatli uy shundoqqina “burnimiz tagida”. Shahar hokimi Jamshid Fozilovning 2015-yil 27-iyul kuni bizga yuborgan ogohlantirish xatida biz yashayotgan 46-xonadon ham buzilishga tushgani haqida aytilgandi.

Aniqlanishicha, shahar hokimining ushbu ogohlantirish xatida aholi xonadonlari Prezidentning 2013-yil 25-iyuldagi “Qarshi shahrini kelajakda qayta qurish rejasi va zamonaviy yo‘l-transport kommunikatsiyalarini rivojlantirish davlat dasturi to‘g‘risida”gi qaroriga asosan qizil chiziqqa tushgani yozilgan.

— Rejaga ko‘ra, biz yashayotgan uylar o‘rni bolalar o‘yingohi bo‘lishi kerak ekan, — deydi Lobar Boboyeva. — Ammo ko‘rib turganingizdek, ishlar yakuniga yetmadi.

Kuzatuvlarimizga ko‘ra, hududda qad rostlagan ko‘p qavatli uylar yonida haqiqatan ham bolalar o‘yingohi qurilmagan.

Ushbu ko‘chada yashovchi Xolmamat Aliqulovning aytishicha, buzilishi mo‘ljallangan 15 ta xonadon saralab buzilgan va zarar qoplab berilgan.

— Bizdan oldingi va keyingi uylar buzilgan, ammo o‘rtada biz va qo‘shnilarimiz yashayotgan 3 ta xonadon qolib ketdi, — deydi Xolmamat Aliqulov. — Uyimiz buzilishga tushadi deyishgani bois, ikkilanib qoldik. Xotirjam yasholmayapmiz, arosatda qoldik.

Aholi shikoyatiga ko‘ra, ular yashayotgan uylarning shundoqqina peshonasida qad rostlagan ko‘p qavatli uy qurilishi paytida hovli devorlariga zarar yetgan. Hojatxonalar qulab tushgan.

— “Dom” qurilayotgan payt hovlimiz devorlariga katta zarar yetkazildi, — deydi Lobar Boboyeva. — Qurilish materiallari olib kelib to‘kilishi natijasida devorlarimiz quladi. Qulagan devorlar o‘rniga devor qurilmasdan, vaqtincha yopib ketildi. Qolaversa, yomg‘irli mavsumda “dom” tomidan tushayotgan oqova suvlar to‘g‘ri kelib bizning hojatxonaga kiryapti, shu bois hojatxonamiz ham qulab tushdi. “Dom”dagilarga tomosha bo‘lib yashashimiz kamdek, endi moddiy zarar ham ko‘ryapmiz. Bu adolatsizlik emasmi?

Qarshi shahar hokimi o‘rinbosari Ulug‘bek Avazovning ma’lum qilishicha, aholi xonadonlari bilan yonma-yon joylashgan ushbu ko‘p qavatli uyni “Nazar bunyodkori” MChJ quruvchilari qurgan bo‘lib, moliyaviy ta’minot “Mikrokreditbank” zimmasida bo‘lgan. Ammo qurilish tashkiloti bankrot bo‘lgani bois, ishlar yakuniga yetmagan va boshqa quruvchi jalb etilgan. Ulug‘bek Avazovga ko‘ra, uy qurilishini yakunlagan quruvchi zarar uning davrida bo‘lmaganini aytib, zararni qoplashdan bosh tortishi mumkin.

— Qurilish paytida aholi devorlariga yetkazilgan zararni qoplash uchun shahar hokimligi aholi manfaatlarini ko‘zlab, Turdiali Xalilov rahbarligidagi “Nazar bunyodkori” MChJni sudga beradi, — deydi Ulug‘bek Avazov. — Sud qaroriga muvofiq zarar qoplab beriladi.

“Daryo” muxbiri bilan suhbatlashgan aholi vakillari buzilishga tushgan xonadonlari qoladigan bo‘lsa, ko‘p qavatli uy va xonadonlari o‘rtasida devor tortilishini istamoqda.

— Xo‘p, agar ko‘p qavatli uylar uchun bolalar o‘yingohi shart bo‘lmasa va o‘sha paytda nazarda tutilgan loyiha bekor bo‘lgan bo‘lsa, biz hech narsa deyolmaymiz, — deydi Xolmamat Aliqulov. – Ammo bizga yetkazilgan zarar qoplansin. Ko‘p qavatli uy va hovlimiz o‘rtasida devor qurib berishsin. Bu devor “dom”dan tushayotgan suvlarga bardosh beradigan va 10-20 yilga kafolatlangan bo‘lsin.

Shahar hokimi o‘rinbosari Ulug‘bek Avazovning ma’lumot berishicha, ushbu xonadonlar o‘rnida ham ko‘p qavatli uy qurilishi uchun aholi taklifiga binoan quruvchi tanlangan. Quruvchi taklif qilayotgan narx xonadon vakillarini qoniqtirmayapti.

— Biz istiqomat qilayotgan 46-uyni 220 million so‘mga narxlashyapti, — deydi Lobar Boboyeva. – Ammo bundan ikki yil ilgari uyimizni 314 million so‘m baholashgan. Qanday qilib men kam narxga beraman? Ertaga o‘rniga yana uy sotib olishim bor. Quruvchining o‘zi qurgan ko‘p qavatli uylardan bir xonali uyning narxini so‘rab ko‘ring, binoyidek hovli uchun berilayotgan puldan ham baland.

— Bizning hovlimiz uchun 200 million taklif qilishdi, — deydi Dilsora Nomerova. – Ammo biz narxlatgan paytimiz 220 million deyishgan. Shuning uchun rozilik bermayapmiz.

Xolmamat Aliqulov yashab kelayotgan hovlisini 490 million baholashgani, ammo shu paytga qadar biror bir quruvchi narx taklif qilmaganini bildirmoqda.

Qarshi shahrini zamonaviy shahar qilish uchun o‘sha paytda qilingan ishlar tahsinga loyiq, albatta. Shahar ko‘rkiga ko‘rk qo‘shish, toboro ko‘payib borayotgan shahar ahlining uy-joyga bo‘lgan ehtiyojini qondirish maqsadida zamonaviy ko‘p qavatli uylarning qad rostlashi esa nur ustiga nur.

Biroq, har bir ish belgilangan rejaga ko‘ra bajarilsa maqsadga muvofiq bo‘lardi. Aholi shikoyatini o‘rganish davomida ko‘plab savollar ochiq qoldi. “Kitob” ko‘chasidagi 15 ta xonadonga nima uchun buzilishi to‘g‘risidagi ogohlantirish xati berildi? Ushbu xonadonlar o‘rnida haqiqatdan ham bolalar o‘yingohi bo‘lishi nazarda tutilganmidi? Unda nega loyihada ko‘rsatilgan ishlar yakuniga yetmadi?

Ochiq qolayotgan savollarga mas’ullar tez orada javob beradi degan umiddamiz.