Нурсиз ўтган Мадрид дербиси, «Барселона» эса нохуш анъанасига барҳам берди. Ла Лигада тур тафсилотлари

Испания чемпионатида 27—29 сентябрь кунлари 7-тур учрашувлари бўлиб ўтди. «Дарё» одатга кўра тур тафсилотлари билан таништиради.

«Хетафе» — «Барселона»

Мавсумни муваффақиятсиз бошлаган «Барселона» ниҳоят сафардаги ўйинда ғалабага эришган ҳолда нохуш анъанасига барҳам берди. Аслини олганда «Хетафе» мавсумни яхши бошлаган эди. Биринчи турда «Атлетико»га минимал ҳисобда ютқазган «кўклар» ундан кейин мағлубиятсиз одимлаб келаётганди. Ўтган мавсум якунига кўра Европа Лигаси йўлланмасини қўлга киритган жамоа мусобақа 1-турида «Трабзонспор»ни енгди (1:0), Ла Лига доирасида «Мальорка»га тўртта гол урган ҳолда (4:2), «Валенсия» билан жанговар дуранг (3:3) қайд этганди.

Эрнесто Вальверде шогирдлари эса бунгача ушбу мавсумдаги кетма-кет тўртта сафар ўйинида ғалаба қозона олмаган эди. Мазкур баҳсда ҳисоб ишончли кўриниш олган бўлса-да, каталонлар ўйин ташкил қилиш борасида анча оқсади. Бунинг устига эндигина сафга қайтган Усмон Дембеле яна жароҳат олди. Шунингдек, ушбу учрашувни жамоа сардори Лионель Месси ва ёш иқтидор эгаси Ансумане Фати ҳам жароҳат сабаб ўтказиб юборди.

«Атлетико» — «Реал»

Турнинг марказий учрашувида Мадриднинг икки етакчи клуби ўзаро тўқнаш келди. Учрашувда кутилганидек кескин руҳда ўтди, бироқ жамоаларга ҳужумлардаги ёрқинлик ва аниқлик етишмади. Диего Симеоне жамоаси бундай ёпиқ ўйин кўрсатиши янгилик эмас. Бироқ Зинедин Зидан шогирдлари ҳам урғуни кўпроқ эҳтиёткорликка қаратди.

Учрашув мобайнида «Реал» футболчилари вазиятлар яратиш ва дарвоза томон зарба йўллаш борасида «матрасчилар»дан устунроқ бўлди. Майдон эгалари «Реал» дарвозаси томон бор-йўғи бир марта аниқ зарба йўллай олди. «Реал» эса саноқли бўлсада хавфли зарбалар ижро этди, бироқ Ян Облакнинг сейвлари «Атлетико»ни муқаррар голлардан асраб қолди.

Яна бир эътиборга молик жиҳати «Реал» кетма-кет учта ўйиндан буён ўз дарвозаси дахлсизлигини сақлаб қолди. Бу эса Зинедин Зидан бошқарувидаги «Реал»да илк бор кузатилди.

«Севилья» — «Реал Сосьедад»

Турнинг сўнгги ўйинида «Севилья» ва «Реал Сосьедад» жамоалари ўзаро баҳс юритди. Мавсумни кўтаринки руҳда бошлаган Хулен Лопетеги шогирдлари сўнгги иккита турда мағлубиятларни қабул қилиб олганди. Дастлаб «Реал»га минимал ҳисобда ютқазган севиляликлар 6-турда «Эйбар»ни икки тўп фарқи билан ютқазаётиб, охирида имкониятни бой бериб қўйганди.

Мазкур ўйинда эса аксинча «Севилья» ирода кўрсатиган ҳолда рақибидан устун келди. Сан-себастианликлар эса турнир жадвалида пешқадамга айланиб олиш имкониятини қўлдан чиқарди.

Тур рақамлари

Ушбу турда жами 23 та гол урилди. Уларнинг олтитаси «Вильярреал» — «Бетис» учрашувида (5:1) киритилди. Фақат Мадрид дербиси нурсиз дуранг билан якунланди. Шу вақтга қадар мағлубиятга учрамаган ягона жамоа «Реал» бўлиб турган бўлса, ғалабага эриша олмаган клуб «Леганес» бўлиб турибди.

Мусобақа жадвали

Тўпурарлар рўйхати