Nursiz o‘tgan Madrid derbisi, “Barselona” esa noxush an’anasiga barham berdi. La Ligada tur tafsilotlari

Ispaniya chempionatida 27—29-sentabr kunlari 7-tur uchrashuvlari bo‘lib o‘tdi. “Daryo” odatga ko‘ra tur tafsilotlari bilan tanishtiradi.

“Xetafe” — “Barselona”

Mavsumni muvaffaqiyatsiz boshlagan “Barselona” nihoyat safardagi o‘yinda g‘alabaga erishgan holda noxush an’anasiga barham berdi. Aslini olganda “Xetafe” mavsumni yaxshi boshlagan edi. Birinchi turda “Atletiko”ga minimal hisobda yutqazgan “ko‘klar” undan keyin mag‘lubiyatsiz odimlab kelayotgandi. O‘tgan mavsum yakuniga ko‘ra Yevropa Ligasi yo‘llanmasini qo‘lga kiritgan jamoa musobaqa 1-turida “Trabzonspor”ni yengdi (1:0), La Liga doirasida “Malyorka”ga to‘rtta gol urgan holda (4:2), “Valensiya” bilan jangovar durang (3:3) qayd etgandi.

Ernesto Valverde shogirdlari esa bungacha ushbu mavsumdagi ketma-ket to‘rtta safar o‘yinida g‘alaba qozona olmagan edi. Mazkur bahsda hisob ishonchli ko‘rinish olgan bo‘lsa-da, katalonlar o‘yin tashkil qilish borasida ancha oqsadi. Buning ustiga endigina safga qaytgan Usmon Dembele yana jarohat oldi. Shuningdek, ushbu uchrashuvni jamoa sardori Lionel Messi va yosh iqtidor egasi Ansumane Fati ham jarohat sabab o‘tkazib yubordi.

“Atletiko” — “Real”

Turning markaziy uchrashuvida Madridning ikki yetakchi klubi o‘zaro to‘qnash keldi. Uchrashuvda kutilganidek keskin ruhda o‘tdi, biroq jamoalarga hujumlardagi yorqinlik va aniqlik yetishmadi. Diyego Simeone jamoasi bunday yopiq o‘yin ko‘rsatishi yangilik emas. Biroq Zinedin Zidan shogirdlari ham urg‘uni ko‘proq ehtiyotkorlikka qaratdi.

Uchrashuv mobaynida “Real” futbolchilari vaziyatlar yaratish va darvoza tomon zarba yo‘llash borasida “matraschilar”dan ustunroq bo‘ldi. Maydon egalari “Real” darvozasi tomon bor-yo‘g‘i bir marta aniq zarba yo‘llay oldi. “Real” esa sanoqli bo‘lsada xavfli zarbalar ijro etdi, biroq Yan Oblakning seyvlari “Atletiko”ni muqarrar gollardan asrab qoldi.

Yana bir e’tiborga molik jihati “Real” ketma-ket uchta o‘yindan buyon o‘z darvozasi daxlsizligini saqlab qoldi. Bu esa Zinedin Zidan boshqaruvidagi “Real”da ilk bor kuzatildi.

“Sevilya” — “Real Sosyedad”

Turning so‘nggi o‘yinida “Sevilya” va “Real Sosyedad” jamoalari o‘zaro bahs yuritdi. Mavsumni ko‘tarinki ruhda boshlagan Xulen Lopetegi shogirdlari so‘nggi ikkita turda mag‘lubiyatlarni qabul qilib olgandi. Dastlab “Real”ga minimal hisobda yutqazgan sevilyaliklar 6-turda “Eybar”ni ikki to‘p farqi bilan yutqazayotib, oxirida imkoniyatni boy berib qo‘ygandi.

Mazkur o‘yinda esa aksincha “Sevilya” iroda ko‘rsatigan holda raqibidan ustun keldi. San-sebastianliklar esa turnir jadvalida peshqadamga aylanib olish imkoniyatini qo‘ldan chiqardi.

Tur raqamlari

Ushbu turda jami 23 ta gol urildi. Ularning oltitasi “Vilyarreal” — “Betis” uchrashuvida (5:1) kiritildi. Faqat Madrid derbisi nursiz durang bilan yakunlandi. Shu vaqtga qadar mag‘lubiyatga uchramagan yagona jamoa “Real” bo‘lib turgan bo‘lsa, g‘alabaga erisha olmagan klub “Leganes” bo‘lib turibdi.

Musobaqa jadvali

To‘purarlar ro‘yxati