Шуҳрат Ғаниев «Дўппи» шеърини ёд айтиб берган болага компьютер совға қилди

Фарғона вилояти ҳокими Шуҳрат Ғаниев Бешариқ туманидаги бир қатор қишлоқларда сайёр қабул ўтказди, деб хабар беради ЎзА.

Сайёр қабул давомида жисмоний ва юридик шахслар томонидан 49 та турли мазмундаги мурожаатлар тушди. Шундан 11 таси жойида ҳал этилди, қолгани эса тегишли масъуллар томонидан қонуний тушунтиришлар ўтказилиб, мутасаддиларга кўрсатма ва топшириқлар берилди.

Шунингдек, вилоят ҳокими 18-умумтаълим мактабида бўлиб, ўқитувчилар ва ўқувчилар билан суҳбатда бўлди. Мактабга китоблар жамланмаси туҳфа қилинди, фаол ўқитувчилар эса совғалар билан тақдирланди. 4-синф ўқувчиси Лазизбек Баҳодиржонов эса Ўзбекистон халқ шоири Муҳаммад Юсуфнинг «Дўппи» номли шеърини ўқиб, вилоят ҳокимининг эътирофига сазовор бўлди. Унга компьютер совға қилинди.

Эслатиб ўтамиз, Фарғона вилояти Қўқонда Халқаро ҳунармандчилик фестивалига тайёргарлик ишларига бағишланган йиғилишда «Қўқон ушшоғи»дан тўрт мисрани айтиб берган қўқонлик олимни Nexia билан тақдирлаган эди.

Бундан ташқари, Шуҳрат Ғаниев сайёр қабул доирасида ёлғиз икки фарзандни тарбиялаётган Чўлпоной Мўйдинова исмли аёлнинг ҳолидан хабар олди. Унинг уйи таъмирга муҳтож эди. Вилоят ҳокимлиги кўмагида 2 хонали янги уй қурилишига киришилди. Вилоят ҳокими Шуҳрат Ғаниев мазкур хонадонда бўлди, Мўйдиновага тикув машинаси ва озиқ-овқат маҳсулотлари топширилди.

Шунингдек, қабул давомида 3 нафар ногиронлиги бўлган фуқарога ногиронлик аравачаси тақдим қилинди.