Қашқадарёлик тез тиббий ёрдам ҳайдовчиларининг «Дарё» мухбирига билдиришича, 26 сентябрь куни ҳайдовчилар билан мулоқот ўтказган вилоят ҳокими ўринбосари Сирожиддин Азизов соғлиқни сақлаш бошқармаси раҳбариятига бошқармага қарашли махсус ва тез тиббий ёрдам автохўжалиги раҳбарини 2 кун муддат ичида ишдан олиш ҳақида кўрсатма берган.
«Дарё» мухбирининг аниқлик киритишича, 26 сентябрь куни Қашқадарё вилоят соғлиқни сақлаш бошқармасига қарашли махсус ва тез тиббий ёрдам автохўжалигида ҳайдовчилар ва раҳбарият иштирокида мулоқот ўтказилган.
Мулоқотда вилоят ҳокими ўринбосари Сирожиддин Азизов ҳамда соғлиқни сақлаш бошқармаси бошлиғи ўринбосари Ботир Жўраев иштирок этган.
Тез тиббий ёрдам ҳайдовчиларининг маълумот беришича, мулоқотда барча туманлардан келган 200 нафарга яқин ҳайдовчи қатнашган.
— Раҳбариятнинг ноҳақлиги жонга тегди, — дейди 32 йилдан бери ҳайдовчилик қилаётган Бўри Суяров. — Шукурки, яқинда ойликларимиз ошди. Энди хурсанд бўлган пайтимиз автохўжалик раҳбарияти битта автомобилни бошқараётган 4 нафар ҳайдовчи ёнига бешинчи ҳайдовчини ҳам ишга олмоқда. Натижада ошган ойликларимиз яна камайди.
Тез тиббий ёрдам ҳайдовчиларининг айтишича, Ғузор ҳамда Чироқчи туманларида бешинчи ҳайдовчилар аллақачон иш бошлаган.
Учрашувда вилоят соғлиқни сақлаш бошқармаси вакили сифатида иштирок этган Ботир Жўраев «Дарё» мухбири билан мулоқотдан бош тортиб, барча гапларни бошқармада гаплашиб олишга чақирди. Мухбир барча саволларга ҳайдовчилар ёнида аниқлик киритиш таклифини бергач, масъул у билан мулоқот қилишдан бош тортди ва вазиятга изоҳ бермади.
Вилоят соғлиқни сақлаш бошқармаси ахборот хизмати раҳбари Нуриддин Эгамов «Дарё» мухбири саволига жавобан вилоят ҳокими ўринбосари тез тиббий ёрдам ҳайдовчилари билан мулоқот қилганини тасдиқлаб, мазкур иш шаҳар прокуратураси томонидан ўрганилаётганини билдирди.
— Автохўжалик раҳбари Наим Халиловнинг ишдан олиниш ёки олинмаслиги Қарши шаҳар прокуратурасининг якуний хулосасига боғлиқ, — дейди Нуриддин Эгамов.
Эслатиб ўтамиз, бундан аввалроқ «Дарё» нашрида вилоятдаги тез тиббий ёрдам ҳайдовчиларининг раҳбариятидан норозилиги ва ёнилғи учун ишчилар ойлигидан ушлаб қолиниши хусусида сўз юритилганди. Бунга жавобан вилоят соғлиқни сақлаш бошқармасининг муносабати чоп этилиб, унда мазкур иш прокуратура томонидан ўрганилаётгани маълум қилинганди.
Изоҳ (0)