«Ўзшаҳар қурилиш инвест» ИК ижтимоий тармоқларда Сергелидаги уйларнинг нархи яна ошиши борасида тарқалган хабарлар асоссиз эканлиги, хабарда акс этган ҳужжат эса ҳеч қандай юридик кучга эга эмаслигини маълум қилди, деб хабар беради ЎзА.
2019 йил дастурига мувофиқ «Ўзшаҳар қурилиш инвест» инжиниринг компанияси томонидан республика шаҳарларида 7 ва 9 қаватли ғишт ҳамда панел типидаги, 16 қаватли қуйма темир-бетон типидаги лойиҳалар асосида жами 403 та уй-жойларнинг қурилиш-монтаж ишлари олиб борилган. Ҳозирда уй-жойларни фойдаланишга топшириш ишлари амалга оширилмоқда.
Ушбу уй-жойларнинг лойиҳа-смета ҳужжатлари 2019 йил I чорагида давлат экспертиза кўригидан ўтказилиб, унга кўра қўшилган қиймат солиғисиз (ҚҚСсиз) 7 қаватли уй-жойларнинг 1 квадрат метр нархи ўртача 3 980 000 сўмни, 9 қаватли уй-жойларнинг 1 квадрат метри нархи ўртача 4 100 000 сўмни, йиғма темир-бетон конструкцияли (панел типдаги) лойиҳа асосидаги 9 қаватли уй-жойларнинг 1 квадрат метри нархи ўртача 4 330 000 сўмни, қуйма темир-бетон типдаги лойиҳа асосидаги 16 қаватли уй-жойларнинг 1 квадрат метри нархи ўртача 4 160 000 сўмни ташкил этмоқда.
«Ушбу нархлар давлат экспертиза хулосаларига асосан бўлиб, уй-жойларда қурилиш-монтаж ишлари якунланганидан сўнг, ҳақиқий харажатлардан келиб чиқиб, хонадонларнинг 1 квадрат метри ҳақиқий нархи шаклланади. Бунда юқорида кўрсатилган давлат экспертиза хулосалари асосида тасдиқланган баҳолардан ошмаслигини ‘Ўзшаҳар қурилиш инвест’ ИК кафолатлайди.
Юқоридагиларни инобатга олиб, ижтимоий тармоқларда тарқатилаётган маълумотларни асоссиз эканлиги, аниқ ва ишончли маълумотларни «Ўзшаҳар қурилиш инвест» ИК матбуот хизмати ҳамда +99895 514 50 50 ишонч рақами орқали олишингиз мумкинлигини маълум қиламиз», — дейилади хабарда.
Изоҳ (0)