Shuhrat G‘aniyev “Do‘ppi” she’rini yod aytib bergan bolaga kompyuter sovg‘a qildi

Farg‘ona viloyati hokimi Shuhrat G‘aniyev Beshariq tumanidagi bir qator qishloqlarda sayyor qabul o‘tkazdi, deb xabar beradi O‘zA.

Sayyor qabul davomida jismoniy va yuridik shaxslar tomonidan 49 ta turli mazmundagi murojaatlar tushdi. Shundan 11 tasi joyida hal etildi, qolgani esa tegishli mas’ullar tomonidan qonuniy tushuntirishlar o‘tkazilib, mutasaddilarga ko‘rsatma va topshiriqlar berildi.

Shuningdek, viloyat hokimi 18-umumta’lim maktabida bo‘lib, o‘qituvchilar va o‘quvchilar bilan suhbatda bo‘ldi. Maktabga kitoblar jamlanmasi tuhfa qilindi, faol o‘qituvchilar esa sovg‘alar bilan taqdirlandi. 4-sinf o‘quvchisi Lazizbek Bahodirjonov esa O‘zbekiston xalq shoiri Muhammad Yusufning “Do‘ppi” nomli she’rini o‘qib, viloyat hokimining e’tirofiga sazovor bo‘ldi. Unga kompyuter sovg‘a qilindi.

Eslatib o‘tamiz, Farg‘ona viloyati Qo‘qonda Xalqaro hunarmandchilik festivaliga tayyorgarlik ishlariga bag‘ishlangan yig‘ilishda “Qo‘qon ushshog‘i”dan to‘rt misrani aytib bergan qo‘qonlik olimni Nexia bilan taqdirlagan edi.

Bundan tashqari, Shuhrat G‘aniyev sayyor qabul doirasida yolg‘iz ikki farzandni tarbiyalayotgan Cho‘lponoy Mo‘ydinova ismli ayolning holidan xabar oldi. Uning uyi ta’mirga muhtoj edi. Viloyat hokimligi ko‘magida 2 xonali yangi uy qurilishiga kirishildi. Viloyat hokimi Shuhrat G‘aniyev mazkur xonadonda bo‘ldi, Mo‘ydinovaga tikuv mashinasi va oziq-ovqat mahsulotlari topshirildi.

Shuningdek, qabul davomida 3 nafar nogironligi bo‘lgan fuqaroga nogironlik aravachasi taqdim qilindi.