2019 йил 19 март куни соат 17:00 ларда Каттақўрғон тумани, «Номозполвон» маҳалласида яшовчи Ихтиёр Иргашев Тошкентда бўлган вақтида турмуш ўртоғи Л.Н. қариндошининг уйига рухсатисиз борганлигини важ қилиб, уни телефон орқали ҳақоратлаган. Тошкентдан келгунига қадар фарзандларини қолдириб, ўзи уйдан чиқиб кетишини талаб қилган.
20 март куни соат 04:00 атрофида Тошкентдан уйига қайтган Ихтиёр турмуш ўртоғига бешафқат муомала қилган. Шаъни ва қадр-қимматини камситиб, икки нафар вояга етмаган фарзандини қолдириб, уйидан чиқиб кетишини талаб қилган, уриб, тан жароҳати етказган.
Бу тайзиқлар оқибатида Л.Н. ўша куни соат 05:30 атрофида уйидаги оғилхонага ўзини осиб, жонига суиқасд қилган. Турмуш ўртоғини осилган ҳолда кўрган И.Иргашев ва унинг онаси уни қутқариб, Каттақўрғон шаҳар тиббиёт бирлашмаси жонлантириш бўлимига олиб борган. Бироқ шифохонада кўрсатилган тиббий муолажаларга қарамасдан Л.Н. 2019 йилнинг 26 март куни вафот этган.
Жиноят ишлари бўйича Каттақўрғон туман судининг очиқ суд мажлисида судланувчи И.Иргашев ўз айбига қисман иқрорлик билдирди.
Суд мажлисида дастлабки тергов органи томонидан судланувчи И.Иргашевнинг моддий томондан айбдорга қарам бўлган шахсга нисбатан раҳмсиз муомала қилиш, унинг шаъни ва қадр-қимматини муттасил равишда камситиш натижасида уни ўзини ўзи ўлдириш даражасига етказишда ифодаланган жиноий ҳаракати тўғри квалификация қилинган деб ҳисобланди.
Жиноят ишлари бўйича Каттақўрғон туман суди раиси Темур Алмаматовнинг «Дарё»га маълум қилишича, судланувчи Ихтиёр Иргашев Жиноят Кодексининг 103-моддаси 2-қисми «а» бандида назарда тутилган жиноятни содир этганликда айбли деб топилиб, 7 йил ва 6 ой муддатга озодликдан маҳрум қилиш жазоси тайинланди.
Изоҳ (0)