24 сентябрь куни йўл ҳаракати хавфсизлиги ойлиги доирасида Тошкент шаҳар ИИББ ЙҲХБ инспекторлари томонидан йўл ҳаракати қоидалари бузилишини аниқлаш бўйича тадбир ўтказилди, деб хабар беради ИИББ матбуот хизмати.
Тадбир давомида пиёдалар томонидан белгиланмаган жойда йўлни кесиб ўтиш бўйича 15 та ҳолат аниқланди. Қоидабузар пиёдаларга нисбатан далолатномалар тузилган. Улар билан йўл ҳаракати хавфсизлиги бўйича суҳбатлар ўтказилган.
Шу куннинг ўзида Тошкент шаҳрининг икки туманида пиёдалар иштирокида ЙТҲ содир бўлган. Иккала ҳолатда ҳам пиёдалар автомобиль йўлини белгиланмаган жойдан кесиб ўтишга уринган. Мисол учун, соат 21:00 да Чилонзор туманидаги Бунёдкор кўчасида Matiz автомобили ҳайдовчиси йўлга югуриб чиққан 37 ёшли пиёдани уриб юборган. Содир бўлган кўнгилсиз воқеадан икки соат олдин Яшнобод туманида Spark ҳайдовчиси белгиланмаган жойдан йўлни кесиб ўтаётган 77 ёшли пиёдани туртиб юборган.
Йўл-патрул хизмати инспекторлари томонидан тадбирлар давомида пиёдалар ўтиш жойидан пиёдаларни ўтказиб юбормаган 219 нафар ҳайдовчига, шунингдек, тўхтаб туриш тақиқланган жойда тўхтаган 148 нафар қоидабузарга нисбатан маъмурий далолатномалар тузилган.
Бундан ташқари, инспекторлар томонидан светофорнинг тақиқланган белгисида ҳаракатланган 103 нафар ҳайдовчи, маст ҳолатда транспорт воситасини бошқарган 11 нафар ҳайдовчи аниқланган.
Изоҳ (0)