24-sentabr kuni yo‘l harakati xavfsizligi oyligi doirasida Toshkent shahar IIBB YHXB inspektorlari tomonidan yo‘l harakati qoidalari buzilishini aniqlash bo‘yicha tadbir o‘tkazildi, deb xabar beradi IIBB matbuot xizmati.
Tadbir davomida piyodalar tomonidan belgilanmagan joyda yo‘lni kesib o‘tish bo‘yicha 15 ta holat aniqlandi. Qoidabuzar piyodalarga nisbatan dalolatnomalar tuzilgan. Ular bilan yo‘l harakati xavfsizligi bo‘yicha suhbatlar o‘tkazilgan.
Shu kunning o‘zida Toshkent shahrining ikki tumanida piyodalar ishtirokida YTH sodir bo‘lgan. Ikkala holatda ham piyodalar avtomobil yo‘lini belgilanmagan joydan kesib o‘tishga uringan. Misol uchun, soat 21:00 da Chilonzor tumanidagi Bunyodkor ko‘chasida Matiz avtomobili haydovchisi yo‘lga yugurib chiqqan 37 yoshli piyodani urib yuborgan. Sodir bo‘lgan ko‘ngilsiz voqeadan ikki soat oldin Yashnobod tumanida Spark haydovchisi belgilanmagan joydan yo‘lni kesib o‘tayotgan 77 yoshli piyodani turtib yuborgan.
Yo‘l-patrul xizmati inspektorlari tomonidan tadbirlar davomida piyodalar o‘tish joyidan piyodalarni o‘tkazib yubormagan 219 nafar haydovchiga, shuningdek, to‘xtab turish taqiqlangan joyda to‘xtagan 148 nafar qoidabuzarga nisbatan ma’muriy dalolatnomalar tuzilgan.
Bundan tashqari, inspektorlar tomonidan svetoforning taqiqlangan belgisida harakatlangan 103 nafar haydovchi, mast holatda transport vositasini boshqargan 11 nafar haydovchi aniqlangan.
Izoh (0)