«Дарё» таҳририятига Самарқанд шаҳрида яшовчи Фадия Ғафурова мурожаат қилиб, ҳозирда Жиззах вилояти, Шароф Рашидов тумани ҳокими, Самарқанд вилоятининг собиқ ҳокими Зоир Мирзаев шаҳардаги У.Жўрақулов кўчасида жойлашган автошоҳбекатидаги савдо дўконини ноқонуний тарзада бузиб ташлаганини баён қилган.
— Бу ер ташландиқ жой эди. Шу ерда жойлашган корхона ишчилари уйини сув босган. Шу сабабли ҳокимлик кимки ўз маблағи ҳисобидан фуқароларга жой қилиб берса ер беришини маълум қилганди, — дейди Фадия Ғафурова. — Биз Анатолий Любимовга Ўзбекистон кўчаси, 55-уйдан уй олиб бердик. Шундан сўнг эвазига менга шу ердан 54 квадрат метр ер ажратиб берди. Бу ердаги жарликларни ўзимизнинг ҳисобимиздан тўлдирдик. Шағал сотиб олиб ертўлани кўтардик. Биринчи ва иккинчи қаватни қуйма блок (шлакаблок) билан кўтариб чиқдик. Учинчи қаватни қурамиз деб турганимизда ҳудуд UNESCO’га тегишли эканлигини, UNESCO прокуратурага берганлигини айтиб қолишди. Бу ерда қурилиш бўлмайди дейишди. Шу билан анча йил қолди.
Маълум бўлишича, 2009 йилда Фадия Ғафуровага савдо дўконини бузиш бўйича қоғоз келган. Тадбиркор агар бино бузиладиган бўлса бунга қаршилиги йўқлигини билдирган. Қилинган харажатлар учун товон пули беришларини сўраган.
– Мен давлатнинг ерига даъво қилмайман. Аммо бу савдо дўконини қуришга маблағ сарфлаганман. Бироқ ҳокимлик вакиллари ҳозир маблағ йўқлиги, шу сабабли пул тўлолмаслигини айтди. Шундан сўнг мен «Пул тўланмаса дўконим ҳам тураверади» дедим. Шундан сўнг мени ўша пайтда Самарқанд вилоят ҳокими бўлган Зоир Мирзаев ҳокимликка чақирди. Кейин прокуратурадан одам қўшиб юборди. Улар менга босим ўтказиб, жойни бепул ташлаб кетишимни истади, — дейди Фадия Ғафурова.
Фадия Ғафурованинг қаршилигига қарамасдан, тадбиркор иштирокисиз ва суд ҳукмисиз унинг хусусий мулки бузиб ташланган.
— 2017 йилнинг 23 март куни кўчадан ўтиб кетаётганда қарасам менга тегишли бино йўқ. Автостанция директорининг олдига келиб «Дўконимни ким бузди?» деганимда Зоир Мирзаев бузганлигини айтди. «Бузилган бинонинг қурилиш материаллари қани?» деб сўраганимда олиб чиқиб кетилганлиги, қолганлари майдалаб ертўлага жойлаштирганлигини айтди, — дейди Фадия Ғафурова.
Тадбиркор бир неча бор Президент порталига мурожаат қилган. Аммо ушбу мурожаатлар ҳам охиригача ўрганилмаган. Аниқроғи, порталга ёзилган мурожаат прокуратурага юборилган.
– Прокуратура мурожаатимни ёзиб олиб, 54 квадрат метр майдонга эга бўлган бино ўрнига икки баравар ҳисобида ер қилиб берилишини айтди. Ўша вақтда Самарқанд вилоят прокуратурасининг 7-бўлим бошлиғи Феруз Алимов ўн бор уйимга келиб, бинони қуриб берамиз деб айтди. Сабаби бинони бузишда айнан ўша прокурор бўлган. Бироқ у ҳам алдаб кетди, — дейди тадбиркор. — Ўн маротаба ҳокимликка ариза ташладим. 4-5 маротаба архитектурага бордим. Униси бунисига юборади, буниси унисига юборади. «Қараб туринг, хат боради» дейди. Уч йилдан бери қараб турибман хат келади деб.
Маълум бўлишича, бино бузилишидан аввал Самарқанд вилоят ҳокимлигидан Улуғбек (фамилиясини эслолмади) деган йигит Фадия Ғафуровани ўша вақтдаги вилоят ҳокими Зоир Мирзаев чақираяпти деб олиб кетган. Зоир Мирзаевнинг хонасида бино масаласи муҳокама қилинган. Узоқ муҳокамадан сўнг тадбиркор аёл бино бузилишидан норози эканлигини билдириб, чиқиб кетган.
Шундан сўнг уни ҳеч ким безовта қилмаган. Тадбиркорнинг айтишича, Зоир Мирзаевга бино бузилмаслигини айтгани учун ўч олиш мақсадида гарчи Тошкентга кетган бўлсада унинг савдо дўконини буздириб ташлаган.
Бугунги кунда бузилган биносини қайта тиклаш ва ўрнига замонавий усулда бино қуриш мақсадида Фадия Ғафурова кўплаб мутасадди ташкилотларга мурожаат қилган. Бироқ, негадир юқори турувчи ташкилотлар тадбиркор аёлга бино қуриш учун рухсат бермаяпти.
Самарқанд шаҳар ҳокимининг қурилиш масалалари бўйича ўринбосари Рустам Олимовнинг 2019 йил 3 апрелда йўллаган хатида «Шоҳи Зинда» кўчасида жойлашган маиший хизмат кўрсатиш дўконини қайта қуришга рухсат бериш тўғрисида қилинган мурожаат шаҳар архитектура ва қурилиш бўлими томонидан ўрганиб чиқилганлиги билдирилган. Хусусан, мазкур ҳудуд Самарқанд шаҳар тарихий ёдгорликларни сақлаш ва улардан фойдаланиш Давлат назорат инспекцияси томонидан тарихий ёдгорликларнинг қўриқхона киритилганлиги сабабли Самарқанд вилояти тарихий ёдгорликларни сақлаш ва улардан фойдаланиш Давлат назорат инспекциясининг техник шартлари асосида, Самарқанд вилоят қурилиш бош бошқармаси қошидаги шҳарсозлик кенгашига тақдим этилиши маълум қилинган.
— Мен бузилган бинони ўзим замонавий қилиб қурмоқчиман. Аммо менга ҳеч ким рухсат бермаяпти. Ҳокимлик қилмайсан дейди. Вилоят бош архитекторига мурожаат қилдим. Аммо бирортаси жавоб бергани йўқ, — дейди Фадия Ғафурова.
Тадбиркор аёлнинг айтишича, У.Жўрақулов кўчасида жойлашган автошоҳбекатдаги бинони бузилиши бўйича вилоят ҳокими Эркинжон Турдимовга мурожаат қилмаган. Фақат Самарқанд вилоят архитектура бошқармасига мурожаат қилган.
— 2009 йилда ҳокимлик мени савдо дўконим билан бир қаторда бекатда баланд қурилган бошқа биноларни бузиш бўйича 3 кун муҳлат берганди. Аммо улар кеча-кундуз ишлаб, биносини битқазиб олди. Уларга ҳеч ким индамади. Хўш, нега? Ахир иккала бино ҳам UNESCO ҳудудда жойлашган-ку? Нима учун уларнинг қурилишига рухсат бору, бизнинг қурилишга рухсат йўқ, — дейди тадбиркор. — Мен бу саволни керакли жойга бермоқчиман. Аммо мени калта-култа қилиб юборади-да. Қулоқ ҳам солмайди. Тирик эканман, жойимни ҳеч кимга бермайман, бинони қайта тиклайман.
Тадбиркор аёлнинг айтишича, янги бино қуриш учун Тошкентдан рухсат берилган. Аммо негадир Самарқандда қурилишга рухсат берилмаяпти. Шунингдек, Маданий мерос объэктларини муҳофаза қилиш ва улардан фойдаланиш илмий-ишлаб чиқариш бош бошқармасининг Самарқанд ва Жиззах вилоятлари бўйича давлат инспекцияси бошлиғи Майсара Набираева ҳам Фадия Ғафурова бино қуришига рухсат бермаяпти.
– Шу йил баҳор ойларида Давлат инспекцияси бошлиғи Майсара Набираеванинг олдига бориб, ўзи билан учрашгандим. Ундан аввал «снос» вақтида бир неча бор борганман. Яқин кунларда ҳам бордим. У киши йўқ. Ё меҳмон кутади ёки касал бўлади. Шу сабабли олдига кира олмайман, — дейди Фадия Ғофурова.
«Дарё» тадбиркорнинг мазкур шикояти юзасидан мутасаддилардан жавоб кутади.
Изоҳ (0)