Toshkent shahar IIBB Telegram kanallarida Mirzo Ulug‘bek tumanining “Yalang‘och” dahasidagi daraxtlar noqonuniy ravishda kesilayotgani haqida tarqalgan xabarlarga munosabat bildirdi.
Aniqlanishicha, 5-iyul kuni 9 va 129-uylarning aholisi “Shahriobod” mahalla fuqarolari yig‘iniga qurigan chinorlar va ularning shoxlarini kesish bo‘yicha, shuningdek, “Madaniyat” MFY raisi 5-sentabr kuni 101, 129, 130, 100A, 102A, 103A va 111A sonli uylarning yaqinidagi 50 ta daraxtning shoxlarini kesish bo‘yicha Yagona interaktiv davlat xizmatlari portaliga murojaat qilgan.
12-sentabr kuni Mirzo Ulug‘bek tuman hokimi o‘rinbosari daraxtlarni kesish bo‘yicha ruxsatnomaga imzo chekkan.
23-sentabr kuni soat 11:00 da “Yalang‘och” mavzesida 5 ta qurib qolgan daraxt va boshqa daraxtlarning shoxlari kesilgan.
Tarmoqlarda surati tarqalgan MAN markasidagi avtomobil esa obodonlashtirish boshqarmasiga tegishli. Haydovchi o‘z ishini ko‘rsatmalarga muvofiq bajargan.
Shuningdek, 24-sentabr kuni Mirzo Ulug‘bek tumani navbatchilik qismiga 47 yoshli fuqarodan murojaat kelib tushgan. U Oltintepa ko‘chasida joylashgan uyining oldida daraxtlar noqonuniy kesilayotganini bildirgan. IIB hamda FVV xodimlari voqea joyiga yetib borib, Davlat o‘rmon fondiga kirmaydigan butalar qirqilayotgani, hududda obodonlashtirish ishlari olib borilayotganini aniqlagan.
IIBB fuqarolarni vaziyatni bilmay turib, internet tarmoqlari orqali keskin fikrlar bildirmaslikka chaqiradi.
Izoh (0)