Mudofaa vazirining o‘rinbosari general-mayor Azizbek Ikramovning tashabbusi va ko‘rsatmasiga asosan Sharqiy harbiy okrug qo‘shinlari qo‘mondonligi tasarrufidagi harbiy qism va bo‘linmalarda “Ma’naviyat haftaligi” e’lon qilindi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.
25-sentabr kuni Andijon shahrida joylashgan harbiy qismda Mudofaa vazirligi tarbiyaviy va mafkuraviy ishlar bosh boshqarmasi boshlig‘i polkovnik Akmal Ortiqov, Mudofaa vazirligi huzuridagi Jamoatchilik kengashi Andijon viloyati mintaqaviy bo‘linmasi raisi, Andijon viloyati hokimining o‘rinbosari Manzura Yunusova, mintaqaviy bo‘linma a’zolari va harbiy xizmatchilar ishtirokida davra suhbati o‘tkazildi.
O‘tkazilgan davra suhbatida kengashning vazifalari va hozirgi kundagi ish faoliyati tahlil qilinib, tegishli ko‘rsatmalar berildi. Shuningdek, O‘zbekiston Prezidenti tomonidan ilgari surilgan 5 ta muhim tashabbus bo‘yicha amalga oshirilayotgan amaliy ishlar, harbiy xizmatchilar oila a’zolarining ijtimoiy himoyasi va ma’naviyatini yanada oshirish masalalariga ham alohida e’tibor qaratildi.
Harbiy shaharchalarda tadbirkorlikni qo‘llab-quvvatlash va 5 ta muhim tashabbusning biri bo‘lgan xotin-qizlar bandligini ta’minlash maqsadida Mudofaa vazirligi, Andijon viloyati harbiy-ma’muriy sektori hamda Sharqiy harbiy okrug qo‘shinlari qo‘mondonligi bilan hamkorlikda Andijon garnizonidagi 20-sonli yopiq harbiy shaharcha hududida 3 gektar yer ajratilib, “Al-Hakim” MChJ tarkibida tikuvchilik sexi tashkil etildi.
Mazkur tikuvchilik sexida 150 kishilik ish o‘rni yaratilib, mahalliy aholi bilan birgalikda Andijon garnizonidagi harbiy qismda xizmat qilayotgan harbiy xizmatchilarning 75 nafar oila a’zolari doimiy ish bilan ta’minlandi.Shu bilan birga, hozirda “Al-Hakim” MChJ rahbari tomonidan amalga oshirilayotgan ishlarning amaliy davomi sifatida shu hududning o‘zida yana 150 ish o‘rinli sex qurilishi ishlari amalga oshirilmoqda.
Mazkur sex ishlab chiqarayotgan trikotaj mahsulotlari Qozog‘iston va Belarusga eksport qilinadi. Mudofaa vazirligi tomonidan bu ishlar davom ettirilib, boshqa harbiy okruglarda ham bosqichma-bosqich “Ma’naviyat haftaligi” tashkil etilib, yuqoridagi kabi masalalarga alohida e’tibor qaratilishi rejalashtirilgan.
Izoh (0)